پاکستان پیپلز پارٹی نے سابق وزیراعظم بے نظیر بھٹو اور سابق صدر آصف علی زردای کی صاحبزادی بختاور بھٹو زرداری کی منگنی کے حوالے سے اہم بیان جاری کر دیا ہے۔
پی پی پی میڈیا سیل کا کہنا ہے کہ منگنی کے حوالے سے سوشل میڈیا اور الیکٹرانک میڈیا پر کئی متضاد خبریں سامنے آرہی ہیں جس کی وجہ سے یہ بیان جاری کیا گیا ہے۔
جاری بیان کے مطابق بختاور بھٹو زرداری کی منگنی 27 نومبر کو محمود چوہدری کے ساتھ ہونے کی تصدیق کی گئی ہے اور کہا گیا ہے کہ محمود چوہدری لاہور کے پرانے قصبے سے تعلق رکھنے والے محمد یونس اور بیگم ثریا محمود کے صاحبزادے ہیں۔
بیان میں مزید وضاحت کی گئی ہے کہ محمد یونس نے 1973 میں متحدہ عرب امارات ہجرت کی اور کڑی محنت سے کنسٹرکشن اور ٹرانسپورٹ کا بزنس کھڑا کیا۔
پانچ بہن بھائیوں میں سب سے چھوٹے محمود چوہدری 28 جولائی 1988 کو ابو ظہبی میں پیدا ہوئے۔
پی پی پی کے میڈیا سیل سے جاری بیان میں مزید کہا گیا ہے کہ محمود چوہدری نے پرائمری تعلیم ابوظہبی جبکہ سکینڈری تعلیم برطانیہ سے حاصل کی ہے۔
محمود چوہدری نے قانون کی مزید تعلیم یونیورسٹی آف ڈرہم انگلینڈ سے حاصل کی ہے۔
یاد رہے محمود چوہدری خاندان کے رہائش پذیر ملک متحدہ عرب امارات میں کنسٹرکشن، فنانس اور ٹیکنالوجی کا بزنس سنبھالے ہوئے ہیں۔
بختاور بھٹو زرداری نے بھی اس بیان کو ری ٹوئیٹ کرتے ہوئے نیک تمناؤں کے اظہار پر لوگوں کا شکریہ ادا کیا اور ساتھ لکھا کہ بدقسمتی سے تقریب کے کارڈز باضابطہ طور پر بھیجے جانے سے قبل ہی لیک ہو گئے۔
انہوں نے واضح کیا کہ محمود چوہدری کا کسی امریکی خاندان سے تعلق نہیں ہے جیسا کہ میڈیا پر بتایا جا رہا ہے۔
بختاور بھٹو زرداری نے اس امید کا اظہار کیا کہ اس بیان کے بعد تمام غلط فہمیاں دور ہو جائیں گی۔
