انسداد دہشت گردی کی عدالت نے حافظ سعید کو فنڈنگ کیس 10 سال 6 ماہ قید کی سزا سنا دی۔
میڈیا ذرائع کے مطابق لاہور کی انسداد دہشتگردی کی عدالت میں کالعدم تنظیم کے سربراہ حافظ سعید اور ان کے ساتھیوں کے خلاف فنڈنگ کیس کی سماعت ہوئی جس میں عدالت نے حافظ سعید کو 10 سال اور 6 ماہ قید کی سزا سنائی جب کہ ان کی تمام جائیداد بھی ضبط کرنے کاحکم دیا۔
عدالت نے ان کے ساتھیوں ظفر اقبال اور یحییٰ عزیز کو بھی 10سال 6 ماہ قید اور جرمانے کی سزا سنائی۔ اس کے علاوہ عدالت نے ان کے ایک اور ساتھی عبدالرحمان مکی کو 6 ماہ قید کی سزا سنائی ہے۔
واضح رہے کہ حافظ سعید اور ان کے ساتھیوں کے خلاف فنڈنگ کیس کا مقدمہ سی ٹی ڈی نے درج کیا تھا جب کہ اس سے قبل بھی انسداد دہشتگردی کی عدالت نے ان کو دو مقدمات میں 11 سال قید کی سزا سنائی تھی۔
پاکستان اس وقت ایف اے ٹی ایف کی گرے لسٹ سے باہر نکلنے کے لیے کوششیں کر رہا ہے، اس حوالے سے کئی نئے قوانین بھی منظور کیے گئے ہیں۔
حافظ سعید کے خلاف ہونے والی حکومتی کاوشیں بھی اسی تناظر میں دیکھی جا رہی ہیں، کئی تجزیہ کاروں کا خیال ہے کہ کالعدم تنظیم کے سربراہ کو دی جانے والی سزاؤں کا مقصد گرے لسٹ سے باہر نکلنا ہے۔
