پنجاب کے وزیر جیل خانہ فیاض الحسن چوہان کا کہنا ہے کہ مسلم لیگ ن کے صدر شہباز شریف اور ان کے بیٹے حمزہ شہباز کو پے رول پر رہا کیا جائے گا۔
واضح رہے میاں نواز شریف اور میاں شہباز شریف کی والدہ لندن میں انتقال کر گئی ہیں۔
اس حوالے سے فیاض الحسن چوہان کا کہا تھا کہ وزیراعلیٰ پنجاب عثمان بزدار اور ہم سب ان کے غم میں برابر کے شریک ہیں۔
انہوں نے کہا کہ درخواست آنے پر پے رول پر فوری رہائی کی اجازت دے دی جائے گی۔
صوبائی وزیر کا کہنا تھا کہ عطاء تارڑ، شریف فیملی کے عزیز و اقارب کو جیل میں ملاقات کی اجازت دی ہے۔
واضح رہے کہ نواز شریف اور شہباز شریف کی والدہ بیگم شمیم اختر کے انتقال کی خبر کی تصدیق مسلم لیگ ن کے رہنما عطاء تارڑ نے سماجی رابطے کی ویب سائٹ ٹوئٹر پر جاری کردہ اپنے بیان کے ذریعے کی تھی۔
مسلم لیگ ن کے رہنما عطاء تارڑ نے اپنے بیان میں بتایا کہ میاں نواز شریف اور میاں شہباز شریف کی والدہ محترمہ وفات پاگئی ہیں۔
یاد رہے میاں نواز شریف کی والدہ کی طبیعت گزشتہ ایک ماہ سے ہی خراب تھی لیکن گزشتہ چند روز سے ان کی طبیعت بہت زیادہ خراب تھی۔
مرحومہ کے بڑے بیٹے میاں نواز شریف اپنے علاج کیلئے اس وقت لندن میں مقیم ہیں جبکہ ان کے چھوٹے صاحبزادے شہباز شریف اس وقت لاہور کی جیل میں ہیں۔
مرحومہ کی نماز جنازہ کب اور کہاں ادا کی جائے گی، اس حوالے مسلم لیگ ن کے پارٹی رہنماؤں کی جانب سے کوئی بیان سامنے نہیں آیا ہے۔
