حکومت کی جانب سے تعلیمی ادارے بند کرنے کے اعلان کے ساتھ ہی طلبا میں خوشی کی لہر دوڑ گئی ہے جب کہ وفاقی وزیرتعلیم شفقت محمود ٹوئٹر کا ٹاپ ٹرینڈ بن گئے ہیں۔
طلبا پیر کے روزہونے والے بین الصوبائی وزرائے تعلیم کے اجلاس کا بےتابی سے انتظار کر رہے تھے۔ پریس کانفرنس کے دوران چھٹیوں کے اعلان کے ساتھ ہی ٹویٹر پر شفقت محمود کی شفقت موضوع بحث بن گئی ہے۔
کئی حلقے خصوصاً طلبا کی جانب سے شفقت محمود کے لیے سوشل میڈیا پر دلچسپ میمز شیئر کی جا رہی ہیں۔
ایک صارف کا کہنا تھا کہ شفقت محمود نے طلبا کے لیے اپنی شفقت دکھا دی، وہ کنفرم جنتی ہیں۔
ایک اور صارف نے اپنے پیغام میں لکھا کہ لیڈیز اینڈ جینٹلمین ہمارے نئے وزیراعظم شفقت محمود کو خوش آمدید کہیں جنہیں طلبا نے کنفرم جنتی ہونے کا خطاب دے دیا ہے۔
شفقت محمود نامی ایک اکاونٹ سے جاری پیغام میں لکھا گیا ہے کہ ہاں بچو، کیسی لگی میری شفقت؟
مرزا طلحہ کی جانب سے شیئر کی گئی ویڈیو میں میں طلبا کو جب تک سورج چاند رہے گا، شفقت تیرا نام رہے گا کے نعرے لگاتے دیکھا جا سکتا ہے۔
نوراللہ لکھتے ہیں کہ شفقت محمود کا کنفرم جنتی ہونے کا ٹیسٹ مثبت آیا ہے۔
طحہ احمد نامی ایک اکاونٹ نے شفقت محمود کی تصویر شیئر کرتے ہوئے لکھا کہ اس بندے کے چہرے پر ہی نور ہے۔
یاد رہے وفاقی وزیرتعلیم شفقت محمود نے پریس کانفرنس کے دوران 26 نومبر سے 24 دسمبر تک تعلیمی ادارے بند کرنے کا اعلان کیا تھا۔
آج پیر کے روزہونے والے بین الصوبائی وزرائے تعلیم کے اجلاس کے بعد پریس کانفرنس سے خطاب کرتے ہوئے شفقت محمود کا کہنا تھا کہ ایک مہینے کی چھٹیوں کے دوران اساتذہ آن لائن کلاسز کے ذریعے کورس کو جاری رکھیں گے جب کہ اس دوران اسکول انتظامیہ کو اساتذہ کو بلانے کی اجازت ہوگی۔
شفقت محمود نے بتایا کہ اجلاس میں کیے گئے فیصلے کے مطابق جن علاقوں میں انٹرنیٹ کی سہولت میسر نہیں وہاں کے طلبا کو چھٹیوں سے قبل ہوم ورک دیا جائے گا۔
انہوں نے بتایا کہ 24 دسمبر سے 10 جنوری تک موسم سرما کی چھٹیاں دینے کا فیصلہ کیا گیا ہے۔
وفاقی وزیر کا کہنا تھا کہ اسکولوں کو دوبارہ کھولنے کا فیصلہ 11 جنوری کے بعد کیا جائے گا۔
ان کا کہنا تھا کہ دسمبر میں ہونے والے امتحانات کو جنوری کے وسط تک ملتوی کر دیا جائے گا۔ ان کا کہنا تھا کہ ساتذہ یا کسی اور بھرتیوں کے سلسلے میں ہونے والے امتحانات جاری رہیں گے
