متحدہ عرب امارات نے غیرملکی سرمایہ کاروں پر عائد مقامی شہری کی شراکت کی پابندی ختم کر دی ہے۔
اس فیصلے کے بعد اب غیر ملکی سرمایہ کار امارات میں سو فیصد ملکیتی کمپنیاں قائم کر سکیں گے۔
عرب میڈیا ‘الامارات الیوم’ کے مطابق امارات کے صدر شیخ خلیفہ بن زاید آل نہیان نے اپنے یہاں کمپنیوں کے قانون میں ترمیم پر مشتمل صدارتی فرمان جاری کر دیا ہے۔
واضح رہے گزشتہ کچھ عرصے سے اماراتی حکومت اپنے یہاں اقتصادی اداروں کو مناسب قانونی ماحول فراہم کرنے کیلئے سابقہ قوانین میں ترمیم کر رہی ہے۔
اسی طرح کمپنیوں و منصوبہ سازوں کو اپنے یہاں پرکشش ماحول مہیا کرنے کیلئے نئے قوانین بھی بنائے جا رہے ہیں۔
سرمایہ کاروں کیلئے متعارف کرائے جانے والے امارات کے نئے قانون کے مطابق آئندہ غیر ملکی سرمایہ کار اور صنعت کار کسی قومیت کی پابندی کی بغیر سو فیصد ذاتی کمپنی قائم کر سکیں گے۔
علاوہ ازیں پہلے ایک شرط یہ تھی کہ جو غیر ملکی کمپنی امارات میں اپنی شاخ کھولنا چاہتی ہو اسے کسی مقامی شہری کی خدمات حاصل کرنا ضروری تھا لیکن اب یہ پابندی اٹھا لی گئی ہے۔
خیال رہے امارات نے سرمایہ کاری کے نظام میں بہت ساری ترامیم کی ہیں جن کے بعد غیر ملکی سرمایہ کاروں کی دلچسپی بڑھے گی اور علاقائی و بین الاقوامی سرماییہ کار امارات کا رخ کریں گے۔
یاد رہے متحدہ عرب امارات نے گزشتہ سال غیر ملکی سرمایہ کاروں کو 122 شعبوں میں سو فیصد تک سرمایہ کاری کی منظوری دی تھی۔
امارات کے حکام کا کہنا ہے کہ اس فیصلے کے بعد امارات میں مسابقتی ماحول مضبوط ہوگا۔
