گلگت بلتستان کی قانون ساز اسمبلی کے سرکاری نتائج کے اعلان کے بعد خصوصی نشستوں کے متعلق بھی نوٹیفکیشن جاری کر دیا گیا ہے جس کے بعد پاکستان تحریک انصاف کی 22 نشستیں ہو گئی ہیں۔
ٹیکنوکریٹس کی 3 اور خواتین کی 6 مخصوص نشستوں سے متعلق نوٹیفکیشن چیف الیکشن کمشنر گلگت بلتستان راجا شہباز خان نے جاری کیا۔
گلگت بلتستان کی کل 33 نشستیں ہیں جن میں سے 22 حاصل کرنے کے بعد پی ٹی آئی حکومت بنانے کی پوزیشن میں آ گئی ہے، خواتین کی 6 میں سے 4 اور ٹیکنوکریٹس کی 3 میں سے دو نشستیں پی ٹی آئی کو مل گئی ہیں۔
نوٹی فکیشن کے مطابق ٹیکنوکریٹس کی ایک اور خواتین کی بھی ایک نشست پیپلزپارٹی کو مل گئی ہے جبکہ خواتین کی ایک نشست ن لیگ کو حاصل ہو گئی ہے۔
پاکستان تحریک انصاف کے اکبر علی اور فضل رحیم جبکہ پیپلزپارٹی کے غلام شہزاد ٹیکنوکریٹس نشست پر منتخب ہوئے۔
خواتین کی مخصوص 4 نشستوں پر پی ٹی آئی کی کنیز فاطمہ، ثریا زمان، دلشاد بانو اور کلثوم الیاس منتخب ہوئیں، پیپلزپارٹی کی سعدیہ دانش اور ن لیگ کی صنم بی بی خواتین کی مخصوص نشستوں پر اسمبلی میں پہنچی ہیں۔
گلگت بلتستان کی قانون ساز اسمبلی کے سرکاری نتائج کے مطابق تحریک انصاف نے 10 نشستوں پر کامیابی حاصل کی جبکہ 6 کامیاب آزاد امیدواروں نے پی ٹی آئی میں شمولیت اختیار کی۔
خواتین اور ٹیکنوکریٹس کی نشستوں کی تقسیم کے بعد اسمبلی میں پی ٹی آئی نے 33 کے ایوان میں 22 نشستیں حاصل کی ہیں۔
