اپنی ویڈیو وائرل کریں اور دس لاکھ ڈالر کمائیں، اسنیپ چیٹ

تصاویر اور ویڈیوز بنانے سے متعلق معروف سوشل میڈیا ایپ اسنیپ چیٹ نے اپنے صارفین کے لیے اسپاٹ لائٹ نامی ایک نیا فیچر متعارف کرایا ہے جسے صارفین اپنی کمائی کا ذریعہ بھی بنا سکتے ہیں۔

اسنیپ چیٹ کا یہ نیا فیچر معروف ویڈیو شیئرنگ ایپ ٹک ٹاک کی طرز پر بنایا گیا ہے جس کے ذریعے صارفین اپنی مختصر ویڈیوز بنا سکتے ہیں۔

سنیپ چیٹ کی مقبولیت میں اضافہ کرنے اور صارفین کی توجہ کھینچنے کے لیے کمپنی اس سے پہلے بھی کئی فیچر متعارف کرا چکی ہے لیکن اس بار کمپنی نے صارفین کو لاکھوں ڈالر کمانے کا موقع فراہم کیا ہے۔

کمپنی کی جانب سے جاری بیان میں کہا گیا ہے کہ صارفین اسپاٹ لائٹ فیچر کو استعمال کر کے 10 لاکھ ڈالر تک کی رقم کما سکتے ہیں۔

کمپنی نے اعلان کیا ہے کہ صارفین اسپاٹ لائٹ پر کوئی ایسی منفرد ویڈیو بنائیں جو وائرل ہو جائے تو وہ اس صارف کو 10 لاکھ ڈالرز کی انعامی رقم دیں گے۔

اسنیپ چیٹ کا کہنا ہے کہ وہ وائرل ویڈیو بنانے والے ہر صارفین کو 2020 کے آخر روزانہ 10 لاکھ ڈالرز انعامی رقم دیں گے۔

کمپنی نے ویڈیوز بنانے کے لیے صارفین کے لیے کچھ شرائط رکھی ہیں، کمپنی نے کہا ہے کہ ویڈیو بنانے والے صارف کی عمر سولہ سال سے زائد ہونی چاہیے جب کہ ویڈیو میں ایسا مواد نہیں ہونا چاہیے جس سے نفرت انگیز پیغام آگے پہنچانے کی کوشش کی گئی ہو۔

کمپنی نے انتباہ جاری کی ہے کہ صارفین ایسی ویڈیو نا بنائیں جس میں کسی نشہ آور یا غیرقانونی چیز کو پروموٹ کیا گیا ہو۔

کمپنی کا مزید کہنا ہے کہ انعامی رقم کے حقدار صرف وہ ہی صارفین ہوں گے جن کی ویڈیوز کو زیادہ سے زیادہ لوگوں کی جانب سے دیکھا گیا ہو گا۔