پاکستان میں 2 چینی کمپنیوں کے ساتھ موبائل فون کی مینوفیکچرنگ کے لیے معاہدہ طے پا گیا ہے جس کے بعد اب میڈ ان پاکستان اسمارٹ فونز کی پیداوار شروع ہو جائے گی۔
ابتدائی طور پر دونوں کمپنیاں ایک کروڑ ڈالرز کی سرمایہ کاری کریں گی اور فیصل آباد میں اسمارٹ فونز مینوفیکچرنگ کا پلانٹ لگائیں گی جس سے ملک بھر میں سستے موبائل فونز ملنا شروع ہوں گے۔
یہ بات صوبائی وزیر اسلم اقبال نے بتائی، ان کا کہنا تھا کہ مینوفیکچرنگ پلانٹ سے موبائل فون مقامی سطح پر ہی تیار ہوں گے۔
اس منصوبے کا خیرمقدم کرتے ہوئے انہوں نے کہا کہ حکومت کی سرمایہ کار دوست پالیسیوں کی وجہ سے ملکی اور غیرملکی سرمایہ کار پنجاب کی طرف آ رہے ہیں۔
ملک میں موبائل فون کی مینوفیکچرنگ شروع ہونے سے تقریباً 2 لاکھ افراد کو روزگار ملے گا اور ملک اسمارٹ فون کی عالمی سطح پر سپلائی کا حصہ بن جائے گا جس کے بعد انٹرنیشنل مارکیٹ میں میڈ ان پاکستان موبائل فونز بھی فروخت کیے جا سکیں گے۔
انجینیئرنگ ڈیولپمنٹ بورڈ (ای ڈی بی)فروری2020 میں موبائل ڈیوائس کی مینوفیکچرنگ پالیسی کی منظوری دی تھی۔ پالیسی سے مقامی سرمایہ کاری اور غیر ملکی براہ راست سرمایہ کاری کو فروغ ملے گا۔
ایک اندازے کے مطابق پاکستان میں سالانہ 3 کروڑ 40 لاکھ موبائل فونز فروخت ہوتے ہیں۔ مقامی سطح پر موبائل فون کی تیاری کے بعد پاکستان میں کم قیمت پر اسمارٹ فون کی دستیابی ممکن ہوسکے گی۔
