نواز شریف کی والدہ کی نماز جنازہ ادا کر دی گئی

لاہور: مسلم لیگ ن کے صدر شہباز شریف اور نواز شریف کی والدہ شمیم اختر کی نماز جنازہ ادا کر دی گئی ہے۔
شمیم اختر22 نومبر کو 90 سال کی عمر میں لندن میں انتقال کر گئی تھیں۔
نواز شریف کی ہمشیرہ کوثر بیگم میت کے ساتھ لاہور پہنچیں جب کہ قائد حزب اختلاف شہباز شریف اور حمزہ شہباز نے لاہور ائیر پورٹ سے بیگم شمیم اختر کی میت وصول کی۔
ایئرپورٹ سے میت کو شریف میڈیکل کمپلیکس جاتی امرا پہنچا دیا گیا۔
بیگم شمیم اختر کی نماز جنازہ شریف جاتی امرا میں ادا کی گئی جس میں شہباز شریف، حمزہ شہباز اور مسلم لیگ ن کی مرکزی قیادت کے علاوہ بڑی تعداد میں عوام نے شرکت کی۔
اس سے قبل گزشتہ روز بھی بیگم شمیم اختر کی نماز جنازہ لندن میں ادا کی گئی تھی، جس میں کورونا ایس او پیز کے مطابق صرف 30 لوگوں کو شرکت کی اجازت تھی۔
لندن میں بیگم شمیم اختر کی نماز جنازہ میں نوازشریف، حسین نواز، حسن نواز، اسحاق ڈار، ان کے بیٹے علی ڈار اور قریبی عزیز شریک ہوئے تھے۔
دوسری جانب شہباز شریف اور حمزہ شہباز کو جنازے میں شرکت کے لیے پانچ روز کی پیرول پر رہائی ملی تھی۔
پیرول قواعد کے تحت شہباز شریف اور حمزہ شہباز کی رہائش گاہ سب جیل قرار دی گئی ہے اور جیل کا عملہ اُن کے ساتھ رہے گا۔