جمعیت علماء اسلام (ف) کے سربراہ مولانا فضل الرحمان کے خلاف قومی احتساب بیورو(نیب) کی تحقیقات میں اہم پیش رفت سامنے آئی ہے، خیبرپختونخوا نیب نے مولانا کے قریبی ساتھیوں کو طلب کر لیا ہے۔
نیب کی جانب سے جے یو آئی کے رہنماؤں گل اصغر اور نور اصغر کو 10 دسمبر کو نیب میں پیش ہونے کا نوٹس جاری کیا گیا ہے۔
گل اصغر اور نور اصغر کی نیب میں طلبی آمدن سے زائد اثاثہ جات، کرپشن اور کرپٹ پریکٹس کے الزام پر کی گئی ہے۔
نیب کے نوٹس کے مطابق دونوں افراد کو 10 دسمبر کو صبح 11 بجے طلب کیا گیا ہے، جہاں کی کمبائن انویسٹی گیشن ٹیم ان سے سوالات کرے گی۔
خیال رہے کہ رواں سال ستمبر میں قومی احتساب بیورو نے آمدن سے زائد اثاثہ کیس میں مولانا فضل الرحمان کے خلاف تحقیقات کا آغاز کیا تھا اور اس حوالے سے مختلف امور پر تفتیشی ٹیم تحقیقات کررہی ہے۔
اس ضمن میں جمعیت علماء اسلام کے رہنما حافظ حسین احمد نے نیب کو تنقید کا نشانہ بناتے ہوئے کہا تھا کہ حکومت اپنی بقا کے لیے نیب کو استعمال کررہی ہے، اپوزیشن رفتارکوتیزکرتی ہے تو نیب بھی حرکت میں آجاتی ہے۔
واضح رہے مولانا فضل الرحمان جلسوں میں متعدد بار کہہ چکے ہیں کہ نیب انہیں گرفتار کر کے تو دکھائے۔
