سیکرٹری کابینہ احمد نواز سکھیرا کی سخت مخالفت اور اعتراضات کے باوجود وزیراعظم عمران خان نے ائیرلائن سیال کو کرڑوں روپے کا فائدہ دے دیا۔
کابینہ ذرائع کے مطابق کابینہ کے ایک پچھلے اجلاس میں سول ایوی ایشن ڈویژن نے ایک سمری پیش کی تھی جس میں ائیرسیال کو مالی فوائد دینے کی سفارش کی گئی تھی۔
سیکرٹری کابینہ احمد نواز سکھیرا نے وزیراعظم اور کابینہ ارکان کی توجہ اس جانب دلوائی کہ سول ایوی ایشن نے سمری میں کابینہ ارکان کو گمراہ کرنے کی کوشش کی ہے۔
ان کا کہنا تھا کہ سمری کا عنوان ہی گمراہ کن ہے تاکہ کابینہ ارکان سے مرضی کا فیصلہ کرایا جا سکے۔ احمد نواز کا اعتراض تھا کہ اس سمری میں ائرلائن کے خلاف کارروائی کے بجائے الٹا اسے بہت سارے فوائد دینے کی سفارش کی گئی تھی ۔
سیکرٹری کابینہ نے تمام اراکین کو بتایا کہ رولز کے تحت ائیرسیال اب تک وہ تمام کام پورے نہیں کرسکی جس کے لیے اسے 3 سال پہلے لائسنس کی منظوری دی گئ تھی۔
ان کا کہنا تھا کہ رولز کے تحت اگر ائیرلائن اپنے آپریشن دیے ہوئے وقت میں شروع نہ کرسکے تو نہ صرف اس کا لائسنس کینسل ہوتا ہے بلکہ اس کی سیکیورٹی بھی ضبط کر لی جاتی ہے۔
انہوں نے کابینہ کو بتایا کہ اس معاملے میں دیکھا گیا ہے کہ سول ایوی ایشن نے اپنی سمری میں غلط بیانی کی ہے تاکہ ائیرلائن کو ناجائز فائدے دلوائے جائیں اور کاروائی کے بجائے اس کو کروڑں کا جرمانہ معاف کیا جائے۔
احمد نواز سیکھرا کا کہنا تھا کہ اس ائیرسیال کو کروڑں کا فائدہ دے کر کابینہ ایک راستہ کھول رہی ہے جس کے بعد ہر ائیرلائن اس کیس کا حوالہ دے کر کروڑں روپے کے فائدے مانگیں گی۔ سیکرٹری کابینہ کا کہنا تھا یہ ایک غلط روایت قائم کی جارہی تھی ۔
تاہم وزیراعظم عمران خان نے احمد نواز سکھیرا کے ان اعتراضات کو مسترد کر دیا اور ائیرسیال کو کروڑں روپے کے فوائد دیتے ہوئے اس سمری کی منظوری دے دی جو بقول احمد نواز سکھیرا کابینہ کو گمراہ کرنے کے لیے اجلاس میں لائی گئی تھی۔
وزیراعظم اور ان کی کابینہ اس بات پر بھی چپ رہے کہ کیسے کابینہ جیسے فورم پر جھوٹ اور گمراہ کن سمریاں پیش کر کے وزارتیں اور بیوروکریٹس اپنی پسندیدہ پارٹیوں کو کروڑں کا فائدہ دے رہے تھے ۔
یہ خبر گزشتہ رات معروف صحافی رؤف کلاسرا نے پروگرام ‘مقابل پبلک کے ساتھ’ میں بریک کی تھی اور اس معاملے کی مکمل تفصیلات بیان کی تھیں۔
#RaufKlasra
