پاکستان پیپلزپارٹی کے رہنما نبیل گبول نے انکشاف کیا ہے کہ پی ڈی ایم کی جماعتوں نے فیصلہ کیا ہے کہ وہ اب آپس میں نہیں لڑیں گی اور مل کر وزارت عظمیٰ کا عہدہ بانٹیں گی۔۔
ایک نجی ٹی وی چینل پر بات کرتے ہوئے نبیل گبول نے کہا کہ نوازشریف نے نئے وزیراعظم کے لیے 3 نام پیش کر دیے ہیں، ان میں مریم نواز، بلاول بھٹو اور مولانا فضل الرحمان شامل ہیں۔
انہوں نے بتایا کہ پی ڈی ایم کے فیصلے کے مطابق مسلم لیگ (ن)، پیپلزپارٹی اور جمعیت علمائے اسلام (ف) مل کر 10 سال حکومت کریں گے، اس دوران بلاول بھٹو، مریم نواز اور مولانا فضل الرحمان باری باری وزیراعظم بنیں گے۔
انہوں نے بتایا کہ ان تینوں شخصیات کی وزارت عظمیٰ کا دورانیہ بھی طے کر لیا ہے گیا ہے، یہ بات بڑی ذمے داری سے کہہ رہا ہوں۔
دوسری جانب ایک نجی ٹی وی چینل کی رپورٹ میں دعویٰ کیا گیا ہے کہ نوازشریف نے پی ڈی ایم کو پیشکش کی ہے کہ تمام توجہ موجودہ حکومت کو گرانے پر مرکوز رکھی جائے، اقتدار ملنے پر پہلے پیپلزپارٹی اور پھر جے یو آئی (ف) حکومت بنا لیں۔
رپورٹ کے مطابق نواز شریف نے کہا کہ ن لیگ کو وزارت عظمیٰ حاصل کرنے کی کوئی خواہش نہیں ہے، وزیراعظم کی کوئی اوقات نہیں ہوتی۔
نجی ٹی وی چینل کی رپورٹ میں یہ دعویٰ بھی کیا گیا ہے کہ نواز شریف کی جانب سے پیپلز پارٹی اور مولانا فضل الرحمان کو حکومت کرنے کی پیش کش کیے جانے پر ن لیگ کے کئی رہنما شدید مایوسی کا شکار ہوئے ہیں۔
رپورٹ کے مطابق ن لیگ کے اندر کئی لوگ ہیں جو وزیراعظم بننے کے خواہش مند ہیں، تاہم نواز شریف نے پیپلز پارٹی اور مولانا کو حکومت کرنے کی پیش کش کر کے ان لیگی رہنماوں کی امیدوں پر پانی پھیر دیا۔
