اسلام آباد ( مانیٹرنگ ڈیسک ) ملکی تاریخ میں پہلی بار سپریم کورٹ میں خاتون جج تعینات کرنے کا فیصلہ کرلیا گیا ، جسٹس عائشہ ملک سپریم کورٹ کی پہلی خاتون جج سپریم کورٹ ہوں گی۔ ذرائع کے مطابق چیف جسٹس آف پاکستان جسٹس گلزار احمد نے تاریخی اقدام اٹھاتے ہوئے لاہور ہائی کورٹ کی جسٹس عائشہ ملک کوسپریم کورٹ کا جج بنانے کا فیصلہ کرلیا۔
میڈیا رپورٹ میں ذرائع کا حوالہ دیتے ہوئے بتایا گیا کہ جسٹس عائشہ ملک کو سپریم کورٹ کا جج بنانے کا فیصلہ کیا گیا ہے ، اس حوالے سے چیف جسٹس سپریم کورٹ جسٹس گلزار احمد نے 9 ستمبر کو جوڈیشل کمیشن کا اجلاس طلب کیا ہے ، جس میں جسٹس عائشہ ملک کوسپریم کورٹ کا جج بنانے کی منظوری دی جائے گی۔
جسٹس عائشہ ایک بااصول اور اپنے کام سے سچی لگن رکھنے والی منصف ہیں ، ٹو فنگر ٹیسٹ کے فیصلے سے پہلے بھی جسٹس عائشہ کی عدالت میں پیش ہونے والے مرد وکلا پر ایک دھاک تھی جس میں مزید اضافہ ہو گیا۔
بتایا گیا ہے کہ 54 سالہ جسٹس عائشہ ملک نے ابتدائی تعلیم کراچی کے گرائمر اسکول سے اور ایل ایل ایم کی ڈگری امریکہ کے مشہور ہارورڈ لا اسکول سے حاصل کی ، جس کے بعد انہوں نے واپس کراچی آ کر اپنی عدالتی پریکٹس کا آغاز کیا ، جہاں 4 سال جسٹس عائشہ ملک نے سینئر ایڈووکیٹ سپریم کورٹ فخرالدین جی ابراہیم کے زیر سایہ کام کیا ، اپنی ذاتی زندگی میں جسٹس عائشہ مصوری سے محظوظ ہوتی ہیں اور خاص طور پر منی ایچر آرٹ کو پسند کرتی ہیں ، اس کے علاوہ وہ پالتو جانور رکھنے کی بھی شوقین ہیں۔
