سری لنکا (مانیٹرنگ ڈیسک ) سری لنکن وزیر دفاع نے سیالکوٹ واقعے پر دئیے گئے بیان پر وزیر دفاع پرویز خٹک سے معافی کا مطالبہ کر دیا۔تفصیلات کے مطابق سیالکوٹ میں سری لنکن شخص پریانتھا کے قتل کے حوالے سے وزیر دفاع پرویز خٹک کے متنازع بیان پر سری لنکن وزیر دفاع سرتھ ویرا سکیرا نے ناراضی کا اظہار کرتے ہوئے پرویز خٹک سے معافی کا مطالبہ کیا ہے۔
ایڈمرل (ر) سرتھ ویرا سکیرا نے کہا ہے کہ پاکستانی وزیر کو چاہئیے کہ وہ سری لنکن عوام سے معافی مانگیں۔وفاقی وزیر دفاع پرویز خٹک نے پشاور میں میڈیا سے بات کرتے ہوئے کہا تھا کہ سیالکوٹ میں بچے جوش اور جذبے میں آ گئے تھے، اسی لیے جذبے میں آ کر یہ کام ہو گیا، اس کا یہ مطلب نہیں کہ ملک میں سب کچھ بگڑ چکا ہے۔
انہوں نے کہا کہ دین کی بات پر تو میں بھی جوش میں آ کر غلط کام کر سکتا ہوں۔
لیکن اس کا مطلب یہ نہیں ہے کہ پاکستان تباہی کی طرف جا رہا ہے۔ پرویز خٹک کا کہنا تھا کہ جوانی میں ہم بھی جوش میں آجاتے تھے، کچھ بھی کرنے کو تیار ہوتے تھے، پھر اندازہ ہوا کہ جوش سنبھال کر رکھنا ہوتا ہے۔ بچوں کا یہی ہوتا ہے لڑائیاں بھی ہو جاتی ہیں قتل بھی ہو جاتے ہیں۔پرویز خٹک کے اس بیان پر سوشل میڈیا پر صارفین کی جانب سے ان پر تنقید کی گئی۔
جب کہ سینیٹر شیری رحمان نے بھی انہیں آڑے ہاتھوں لیا۔پی پی رہنما نے سماجی رابطے کی ویب سائٹ ٹویٹر پر ٹویٹ کرتے ہوئے برہمی کا اظہار کیا اور کہا کہ مجھے افسوس ہے۔جس پر پرویز خٹک نے وضاحت پیش کرتے ہوئے کہا کہ میں سیالکوٹ واقعے کی شدید مذمت کرتا ہوں۔میرے بیان کو سیاق و سباق سے ہٹا کر مت دیکھا جائے۔میں نے اس واقعے کو سیاسی جماعت سے جوڑے جانے کے سوال کا جواب دیا۔پرویز خٹک نے مزید کہا کہ پاکستان ہر قسم کی انتہا پسندی کی مذمت کرتا ہے۔اس واقعے کو پاکستان کی بدنامی کے لیے استعمال کرنا ناقابلِ قبول ہے۔
I strongly condemn the incident. My conversation shouldn’t be taken out of context. I replied to a question linking the incident with a political party. Pakistan denounces extremism in all its forms. Linking the incident to defame Pakistan is unacceptable.
— Pervez Khattak (@PervezKhattakPK) December 5, 2021
