اسلام آباد: وفاقی حکومت نے ملک بھر میں امتحانات یکم جون تک ملتوی کرنے کا اعلان کیا ہے۔
پریس کانفرنس سے خطاب کرتے ہوئے وفاقی وزیر تعلیم شفقت محمود کا کہنا تھا کہ تمام امتحانات یکم جون تک ملتوی کرنے کا فیصلہ کیا گیا ہے۔
انہوں نے کہا کہ پاکستان کے تمام 29 بورڈ کے امتحانات یکم جون تک نہیں ہوں گے۔ امتحانات کا تعلق سکول کھلنے یا نہ کھلنے سے نہیں ہو گا۔ یکم جون تک جتنے بھی امتحانات ہیں وہ نہیں ہوں گے۔
انہوں نے مزید کہا کہ کورونا وائرس ملنے جلنے سے پھیلتا ہے، حالات بہتر ہونے کے بعد امتحانات لینے سے متعلق فیصلہ کیا جائے گا۔کیمرج سسٹم کے تحت بھی امتحانات نہیں ہوں گے۔
وفاقی وزیر نے کہا کہ کیمرج سے درخواست ہے کہ امتحانات کا شیڈول آگے بڑھایا جائے۔ یونیورسٹیز میں داخلوں کی تاریخ میں بھی ایک ماہ کی توسیع کی جائے گی۔
وفاقی وزیرتعلیم نے بتایا کہ حکومت طالب علموں کے تحفظ کے لیے اقدامات کرتی تہے گی، 27 مارچ تک ایجوکیشن منسٹر کانفرنس بلا کر جائزہ لیں گے کہ 5 اپریل کو تعلیمی ادارے کھلنے چاہیئں یا نہیں۔
انہوں نے مزید کہا کہ چین میں موجود پاکستانی طالب علم صحت مند اور متحد ہیں، کورونا وائرس سے متعلق صورتحال کا جائزہ لیتے رہیں گے۔
ان کا کہنا تھا کہ غیر ملکی طلباء کو ہاسٹلز اور یونیورسٹیز تک محدود رکھا جائے گا،غیر ملکی طلباء پر ہاسٹلز خالی کرانے کا فیصلہ لاگو نہیں ہو گا، وزیراعظم عمران خان کو تمام فیصلوں اور صورتحال سے آگاہ کر رہے ہیں۔
خیال رہے کہ پنجاب میں کرونا وائرس کے مزید 8کیسز سامنے آ گئے ہیں۔ بلوچستان میں 16، خیبرپختونخوا 16 ،اسلام آباد میں 4 اور گلگت میں تین افراد میں کرونا کی تصدیق ہو چکی ہے۔
کرونا وائرس کے کسیز کی تعداد تیزی کےساتھ بڑھ رہی ہے۔ سندھ میں کورنا وائرس کے کیسز کی تعداد 172 ،پنجاب میں 34 افراد میں کرونا وائرس کی تصدیق ہوئی ہے ۔ تاہم آزاد کشمیر میں ابھی تک کوئی کیسز سامنے نہ آیا۔
وفاقی دارلحکومت اسلام آباد میں بھی چار افراد اس خطرناک وائرس کا شکار ہیں۔ ملک بھر میں کرونا وائر س کے مریضوں کی تعداد 245 ہو چکی ہے۔
