لاہور (مانیٹرنگ ڈیسک ) لاہور میں پولیس اسٹیشن کے سامنے میاں بیوی کو فائرنگ کرکے قتل کردیا گیا، جان بچا کر بھاگنے والی بچے پر بھی گولیاں چلا دی گئیں، پولیس نے بروقت ایکشن ہی نہ لیا، حملہ آور باآسانی فرار۔ تفصیلات کے مطابق لاہور کے علاقے کاہنہ میں عین پولیس اسٹیشن کے سامنے میاں بیوی کو سفاک ملزمان نے بے دردی سے قتل کر دیا۔
میڈیا رپورٹس کے مطابق کاہنہ پولیس اسٹیشن کے سامنے نامعلوم موٹر سائیکل سواروں نے ایک کار پر فائرنگ کردی جس کے نتیجے میں گاڑی میں سوار میاں اور بیوی موقع پر ہی جاں بحق ہوگئے۔ نامعلوم افراد کے اس حملے کے دوران جاں بحق ہونے والے میاں بیوی کے بیٹا اور بیٹی جان بچانے کیلئے گاڑی سے نکل کر بھاگے۔ ملزمان نے گاڑی سے نکل کے بھاگنے والے بچوں کا تعاقب کیا اور جان بچانے کیلئے ایک دکان میں چھپنے والے بچے پر بھی گولیاں چلا کر اسے زخمی کر دیا۔
زخمی بچے کو بعد ازاں ہسپتال منتقل کر دیا گیا۔ جبکہ عین پولیس اسٹیشن کے سامنے پیش آنے والے اس واقعے کے باوجود پولیس اہلکار ایکشن میں نہیں آئی، جس کے نتیجہ میں ملزمان باآسانی فرار ہو گئے۔ واقعے کے بعد پولیس نے موقف اختیار کیا کہ مقتولین کو دیرینہ دشمنی کے باعث قتل کیا گیا، جبکہ واقعے کی تحقیقات کا آغاز کر دیا گیا ہے۔ وزیراعلیٰ پنجاب سردار عثمان بزدارنے کاہنہ میں فائرنگ کے و اقعہ کانوٹس لیتے ہوئے سی سی پی او لاہور سے رپورٹ طلب کر کے ہدایت کی کہ ملزمان کو قانون کی گرفت میں لاکر مزید کارروائی کی جائے اورجاں بحق افراد کے لواحقین کو ہر قیمت پر انصاف فراہم کیا جائے۔
جبکہ آئی جی پولیس پنجاب نے بھی واقعہ کا نوٹس لیتے ہوئے سی سی پی او لاہور سے واقعہ کی رپورٹ طلب کرلی ۔ آئی جی پنجاب نے ملزمان کی جلد از جلد گرفتاری کی ہدایت کرتے ہوئے کہاکہ ملزمان کی گرفتاری کیلئے لاہور اور قصور پولیس پر مشتمل ٹیمیں تشکیل دی جائیں، تمام وسائل کو بروئے کار لاتے ہوئے ملزمان کو جلدگرفتار کیا جائے اور سخت سے سخت سزا دلائی جائے ۔
لاہور میں پولیس اسٹیشن کے سامنے میاں بیوی اور بچوں کو فائرنگ کرکے قتل کردیا گیا
