موٹرسائیکل والوں کیلئے پٹرول سستا کرنے کی تیاری ؟ تفصیلات سامنے آگئیں 

اسلام آباد (نیوز ڈیسک )سینیٹ فنانس کمیٹی کے اجلاس میں پیٹرولیم ڈویلپمنٹ لیوی 60 سے 80 روپے فی لیٹر کرنے پر دوسرے دن بھی بحث جاری رہی۔ چیئرمین سینٹ فنانس کمیٹی نے کہا موٹر سائیکل والوں کے لیے پیٹرول کا مختلف ریٹ ہونا چاہئے،گاڑیاں چلانے والے مہنگا پیٹرول برداشت کر سکتے ہیں۔ وزارت پیٹرولیم کے حکام نے کہا پیٹرول کی 50 فیصد کھپت موٹر سائیکل میں استعمال ہوتی ہے، گاڑیوں اور موٹر سائیکل کو مختلف ریٹ پر پیٹرول دینا ممکن نہیں ،ایک سال پہلے موٹرسائیکل والوں کو سبسڈی دینے پر کام ہوا تھا مگر پیش رفت نہ ہو سکی۔ اس موقع پر چیئرمین کمیٹی نے کہا کہ انڈونیشیا کی حکومت موٹرسائیکل والوں کو کم ریٹ پر پیٹرول مہیا کر رہی ہے،انڈونیشیا کی حکومت موٹرسائیکل والوں کو کم ریٹ پر پیٹرول دے سکتی ہے تو پاکستان کیوں نہیں؟
حکام وزارت پیٹرولیم نے اجلاس میں بتایا ہائی اوکٹین پر پی ڈی ایل 60 سے 75 روپے تجویز کی ہے،سینیٹرمحسن عزیز نے کہا ہائی اوکٹین ڈلوانے والے مہنگا پیٹرول برداشت کر سکتے ہیں،ہائی اوکٹین پر پی ڈی ایل 100 روپے ہونا چا ہئے۔
کمیٹی نے ہائی اوکٹین پر پیٹرولیم لیوی 100 روپے کرنے کی سفارش کر دی،موٹرسائیکل والوں کو سبسڈی دینے کے معاملہ پر وزیر پیٹرولیم سے کل بریفنگ طلب کرلی گئی۔