اسلام آباد (رافعہ زاہد سے ) رؤف حسن کی ساڑھے 7 لاکھ روپے تنخواہ کا مجھے نہیں پتا۔۔۔اگر اس طرح سیاسی جماعتوں پر پابندی لگی تو اگلی باری ن لیگ اور اس کے بعد پیپلز پارٹی کی باری ہوگی۔۔۔لطیف کھوسہ نے حکومت کو خبر دار کر دیا۔۔جیو نیوز کے پروگرام کیپیٹل ٹاک میں گفتگو کرتے ہوئے لطیف کھوسہ نے پارٹی پر پابندی سے متعلق سوال پر بیان دیا کہ کہ تحریک انصاف پر پابندی کا یہ اصولی فیصلہ نہیں، بے اصولی فیصلہ ہے۔انہوں نے مزید بیان دیا کہ اس طرح سیاسی پارٹیوں پر پابندیاں لگائی گئیں تو اگلی باری ن لیگ کی ہوگی، ن لیگ پر پابندی کے بعد اگلی باری پیپلز پارٹی کی ہوگی۔رہنما تحریک انصاف نے پروگرام میں گفتگو کرتے ہوئے کہا کہ نواز شریف کے دور میں مشرف کے جہاز کو پاکستان میں لینڈنگ کی اجازت نہیں دی گئی۔ اس وقت پرویز مشرف کے جہاز کو کہا گیا کہ بھارت میں جاکر لینڈ کریں۔ آج آپ اسی نواز شریف کو لے کر چل رہے ہیں، ان کی فارم 47 کی حکومت بنادی۔ انہوں نے مزید بیان دیا کہ بانی پی ٹی آئی سے منسوب بیان کی قانون کے نظر میں دھیلے کی وقعت نہیں۔9 مئی کا واقعہ جھوٹ ہے، بانی پی ٹی آئی نے کبھی نہیں کہا کہ کسی تنصیب پر چڑھ دوڑیں۔ رہنما تحریک انصاف نے کہا کہ وزیراعلیٰ پنجاب نے سپریم کورٹ کو کہا کہ آہنی ہاتھ سے نمٹیں گے۔کیا یہ توہین عدالت نہیں؟ 11 ججوں نے کہا کہ الیکشن کمیشن نے عدالتی فیصلے کی غلط تشریح کی۔عطاء تارڑ کے روف حسن کی گرفتاری سے متعلق بیان پر لطیف کھوسہ نے کہا کہ رؤف حسن کا ڈیجیٹل میڈیا ونگ سے کوئی تعلق نہیں وہ انفارمیشن سیکریٹری ہیں۔ تنخواہ ٹھیک ہے اگر رؤف حسن لیتے ہیں تو بطور انفارمیشن سیکریٹری لیتے ہیں۔رؤف حسن کی ساڑھے 7 لاکھ روپے تنخواہ کا مجھے نہیں پتا۔
