اسلام آباد(رافعہ زاہد سے ) بھارتی میڈیا جھوٹی اور من گھڑت خبریں پھیلا کر نہ صرف عالمی سطح پر اپنی ساکھ کو نقصان پہنچا رہا ہے، بلکہ اپنی ہی فوج اور مودی حکومت کو بھی شرمندگی سے دوچار کر رہا ہے۔ اس رویے سے خود بھارتی عوام بھی نالاں نظر آتے ہیں اور اب انہوں نے میڈیا پر تنقید کرنا شروع کر دی ہے۔
سوشل میڈیا پر بھارتی نیوز چینل ’آج تک‘ کا ایک ویڈیو کلپ تیزی سے پھیل رہا ہے، جس میں نیوز اینکر اپنے چینل کی طرف سے نشر کی جانے والی غلط معلومات پر معافی مانگ رہی ہیں۔سوشل میڈیا پلیٹ فارم ایکس (سابقہ ٹویٹر) پر بھارتی عوام نے اپنے ملکی میڈیا کو جھوٹ اور پروپیگنڈے کا ذریعہ قرار دینا شروع کر دیا ہے۔
عوامی ردِعمل میں تیزی اُس وقت آئی جب گزشتہ روز ڈی جی آئی ایس پی آر نے بین الاقوامی سطح پر بھارتی حکومت اور میڈیا کی بے بنیاد خبروں اور جھوٹے دعوؤں کو بے نقاب کیا، جس سے بھارت کی عالمی ساکھ کو شدید نقصان پہنچا ہے۔
ایکس صارف موہت کا کہنا ہے کہ آج تک، زی نیوز، ری پبلک اور سودرشن جیسے چینل حد سے زیادہ جھوٹے ہیں، جو پاکستان سے متعلق بے بنیاد اور مضحکہ خیز دعوے کرتے ہیں۔ مزید ایکس صارف موہت نے کہا کہ آج تک نیوز نے کراچی پورٹ کو برباد کیا، زی نیوز نے اسلام آباد پر قبضہ کروایا، ری پبلک چینل نے پاکستانی عاصم منیر کی گرفتاری کروائی، اور سودرشن چینل نے پاکستان کو تباہ کر دیا ۔ یہ سب انتہائی جھوٹ بولنے والے ادارے ہیں۔بھارتی شہری نے بھارتی میڈیا کو پاکستان کی قومی سلامتی کے لیے “نہایت ہی خطرناک” قرار دے دیا ۔
ایکس صارف سریواتسا نے بھارتی میڈیا پر تنقید کرتے ہوئے کہا کہ اب نہ تو ٹی وی چینلز قابل اعتبار رہے ہیں اور نہ ہی صحافی، یہ صرف جعلی ویڈیوز دکھا رہے ہیں، جو انتہائی افسوسناک ہےگزشتہ روز بھارتی بحریہ کی طرف سے کراچی پر حملے کے حوالے سے دعوے سامنے آ رہے تھے۔ کئی بھارتی میڈیا ذرائع، جن میں “ economictimes.indiatimes.com” بھی شامل ہے، نے غلط خبر دی کہ بھارت نے کراچی پورٹ کو ہدف بنا کر ایک اہم فوجی آپریشن کیا ہے۔
