بھارتی فوجی افسر نے اضافی سامان کی فیس مانگنے پر ایئرلائن عملے کو بدترین تشدد کا نشانہ بنا ڈالا۔
میڈیا رپورٹ کے مطابق بھارتی فوج کے ایک سینئر افسر نے مبینہ طور پر اضافی سامان کی فیس ادائیگی کے لیے کہنے پر سری نگر بین الاقوامی ہوائی اڈے پر اسپائس جیٹ فضائی کمپنی کے چار ملازمین کو تشدد کا نشانہ بنا ڈالا، جس سے ایئر لائن کے عملے کے ایک فرد کو ریڑھ کی ہڈی میں فریکچر اور دوسرے کو ٹوٹے ہوئے جبڑے سمیت شدید چوٹیں آئیں۔
ایئر لائن کے آفیشل بیان میں کہا گیا ہے کہ یہ واقعہ سری نگر سے دہلی جانے والی اسپائس جیٹ کی پرواز SG386 کے بورڈنگ گیٹ پر پیش آیا جہاں مسافر دو بیگز میں اضافی کیبن بیگیج لے کر جا رہا تھا جس کا وزن 16 کلو گرام تھا جو کہ 7 کلوگرام کی اجازت شدہ حد سے دوگنا تھا اور مسافر نے اضافی چارجز ادا کرنے سے انکار کر دیا، جب اسپائس جیٹ کے گراؤنڈ سٹاف نے اسے قواعد کے بارے میں مطلع کیا تو مبینہ طور پر افسر نے اس عمل کو نظرانداز کیا اور ایوی ایشن سکیورٹی پروٹوکول کی خلاف ورزی کرتے ہوئے زبردستی ایرو برج میں داخل ہوگیا۔
اسپائس جیٹ کے ایک ترجمان نے بتایا کہ مسافر کو سی آئی ایس ایف کا ایک اہلکار واپس گیٹ پر لے گیا جس کے بعد صورتحال بگڑگئی اور افسر نے مبینہ طور پر گھونسوں لاتوں اور یہاں تک کہ ایئرپورٹ پر موجود جو چیز ہاتھ میں آئی اس کو ہتھیار کے طور پر استعمال کرتے ہوئے عملے پر جسمانی حملہ کردیا، جس سے اسپائس جیٹ کا ایک ملازم بے ہوش ہو کر فرش پر گرگیا لیکن اس کے باوجود مسافر نے بیہوش ملازم کو لاتیں مارنا جاری رکھا، اسی دوران عملے کے ایک اور رکن کو اس وقت جبڑے پر لات لگنے کے بعد ناک اور منہ سے خون بہنے لگا جب وہ بے ہوش ہونے والے ساتھی کی مدد کے لیے ڈھال بنتے ہوئے اس کے اوپر جھک گیا تھا۔
بتایا گیا ہے کہ چاروں ملازمین کو فوری طور پر طبی امداد کے لیے ہسپتال منتقل کر دیا گیا، ان میں سے ایک مبینہ طور پر ریڑھ کی ہڈی کے فریکچر میں مبتلا ہے، جب کہ دیگر کے جبڑے اور چہرے کی چوٹوں کا علاج کیا جا رہا ہے، اس واقعے کے بعد، اسپائس جیٹ نے مقامی پولیس تھانے میں فرسٹ انفارمیشن رپورٹ (ایف آئی آر) درج کرادی، ایئرلائن نے ایئرپورٹ حکام سے واقعے کی سی سی ٹی وی فوٹیج بھی حاصل کر لی اور اسے تفتیشی حکام کے حوالے کردیا۔
علاوہ ازیں اسپائس جیٹ نے مذکورہ مسافر کو نو فلائی لسٹ میں رکھنے کے لیے بھی کارروائی شروع کردی، جس کے لیے ایئرلائن نے شہری ہوا بازی کی وزارت کو بھی خط لکھ کر درخواست کی ہے کہ اس حوالے سے مناسب کارروائی کی جائے تاہم شہری ہوا بازی کی وزارت نے ابھی تک ایئر لائن کی درخواست پر عوامی ردعمل جاری نہیں کیا اور سرکاری طور پر ملوث فوجی افسر کی شناخت ظاہر نہیں کی گئی۔
