اسلام آباد: اسلامی نظریاتی کونسل نے ودہولڈنگ ٹیکس کو غیر شرعی قرار دینے کا فیصلہ واپس لے لیا۔
چیئرمین اسلامی نظریاتی کونسل علامہ راغب نعیمی نے نجی ٹی وی سےگفتگو کرتے ہوئےکہا کہ ود ہولڈنگ ٹیکس معاملے پر اگلے اجلاس میں دوبارہ غور کریں گے، ودہولڈنگ ٹیکس کا معاملہ اجلاس کا آخری ایجنڈا آئٹم تھا، اجلاس کے دوران کھانا لگ گیا تو متعدد ارکان چلے گئے۔
علامہ راغب نعیمی کا کہنا تھا کہ کونسل کے متعدد ارکان ود ہولڈنگ ٹیکس کے خلاف تھے، نوٹ لینے والے عملے نے سمجھا کہ ودہولڈنگ ٹیکس کو غیر شرعی قرار دیا گیا۔
خیال رہے کہ اسلامی نظریاتی کونسل کی پریس ریلیز میں ودہولڈنگ ٹیکس کو غیر شرعی قرار دیا گیا تھا۔
پریس ریلیز اسلامی نظریاتی کونسل کا کہنا تھا کہ ودہولڈنگ ٹیکس غیر شرعی اور زیادتی کے مترادف ہے۔
اس کے علاوہ کونسل نے سپریم کورٹ کے 11 ستمبر کے فیصلے پر بھی تحفظات کا اظہار کیا جس میں نکاح کے بعد رخصتی سے قبل طلاق کی صورت میں نان نفقہ کی ادائیگی لازم قرار دی گئی تھی، کونسل کے مطابق یہ فیصلہ قرآن و سنت کے خلاف ہے۔
انسانی دودھ ذخیرہ کرنے کے اداروں کے قیام کے حوالے سے کونسل نے کہا کہ مخصوص شرائط کے تحت یہ ادارے قائم کیے جا سکتے ہیں، تاہم اس سے قبل لازمی قانون سازی کی جائے اور اس عمل میں کونسل کو شامل کیا جائے۔
کونسل نے دیت کے قانون میں مجوزہ ترامیم کی بھی مخالفت کرتے ہوئے کہا کہ دیت کے قانون میں ترمیم کے لیے پیش کردہ بل سےاتفاق نہیں کرتے، بل میں چاندی کو حذف کرنے اور سونے کی غیر شرعی مقدار کو معیار بنایا گیا ہے۔
کونسل نے کہا کہ دیت کی سونا، چاندی اور اونٹ سے متعلق شرعی مقداریں قانون کا حصہ رہنی چاہئیں۔
اسلامی نظریاتی کونسل نے شوگر کے مریضوں کے لیے حلال اجزا سے تیار شدہ انسولین کے استعمال کی اجازت دی، تاہم خنزیر کے اجزا پر مشتمل انسولین سے پرہیز کرنے کی ہدایت کی اور اس حوالے سے بھی مناسب قانون سازی پر زور دیا۔
