پی ٹی آئی کے حمایت یافتہ وکلاء پینل کو سپریم کورٹ بار ایسوسی ایشن کے حالیہ انتخابات میں اس وقت بڑے دھچکے کا سامنا کرنا پڑا جب اس پینل کو نہ صرف قومی سطح پر بلکہ اس صوبے( خیبر پختونخوا) کے تمام پولنگ اسٹیشنز پر بھی شکست سے دوچار ہونا پڑا جو طویل عرصے سے پی ٹی آئی کا مضبوط گڑھ سمجھا جاتا ہے۔
ذرائع کے مطابق عمران خان کو تاحال اس شکست کی شدت سے آگاہ نہیں کیا گیا، حالانکہ پارٹی کی کئی اہم شخصیات خود وکلا برادری سے تعلق رکھتی ہیں۔ سینیٹر حامد خان کی قیادت میں پی ٹی آئی کی حمایت یافتہ پینل صوبے کے کسی بھی پولنگ اسٹیشن پر کامیابی حاصل کرنے میں ناکام رہی۔ بتایا جا رہا ہے کہ پارٹی کے اندرونی اختلافات ہی اس شکست کی بنیادی وجہ بنے۔
ذرائع کے مطابق پشاور میں پی ٹی آئی کے حمایت یافتہ پینل کو 181 ووٹ ملے، جب کہ آزاد گروپ کے امیدوار — جنہیں وفاقی وزیر قانون اعظم نذیر تارڑ کی حمایت حاصل تھی — نے 186 ووٹ حاصل کیے۔ ایبٹ آباد میں پی ٹی آئی کے امیدوار کو صرف 19 ووٹ ملے، جبکہ حکومت حامی پینل نے 55 ووٹ حاصل کیے۔ سوات میں پی ٹی آئی امیدوار کو 23 ووٹ ملے جب کہ اس کے مخالف کو 27، اور بنوں میں پی ٹی آئی کے حمایت یافتہ امیدوار کو صرف 5 ووٹ ملے، جبکہ آزاد گروپ کے امیدوار نے 25 ووٹ حاصل کیے۔
آزاد گروپ، جس کی قیادت وفاقی وزیر قانون اعظم نذیر تارڑ اور سینئر وکیل احسن بھون کر رہے ہیں، نے گزشتہ ہفتے ایس سی بی اے انتخابات میں ایک اور شاندار کامیابی حاصل کی۔ اس گروپ کے امیدوار ہارون الرشید 400 سے زائد ووٹوں کے فرق سے صدر منتخب ہوئے۔ گروپ نے ایس سی بی اے کی ایگزیکٹو باڈی میں بھی اکثریت حاصل کر لی۔ انصار عباسی کی رپورٹ
