ہریانہ کے ایک 18 سالہ نوجوان کو امریکہ جانے کے غیر قانونی ’ڈنکی روٹ‘ کے ذریعے سفر کے دوران اغوا کر کے گواتیمالا میں یرغمال بنا لیا گیا، جہاں اسمگلرز نے اسے قتل کر دیا۔ یہ الزام مقتول کے گھر والوں نے لگایا ہے۔
یُوراج، جو اپنے والدین کا اکلوتا بیٹا تھا، ضلع کیتھل کے پنڈری قصبے کے موہنا گاؤں سے تعلق رکھتا تھا۔ وہ 13 اکتوبر 2024 کو امریکہ روانہ ہوا تھا۔
گھر والوں کو اس کی موت کا علم گزشتہ ہفتے اس وقت ہوا جب اسمگلرز نے مبینہ طور پر میکسیکو سے جاری کیا گیا ایک ڈیتھ سرٹیفکیٹ بھیجا، جس میں درج تھا کہ یوراج 4 مارچ کو گولی لگنے سے ہلاک ہوا۔
یوراج کے والد کلدیپ کے مطابق گزشتہ سال ایجنٹس نے 41 لاکھ روپے میں امریکہ پہنچانے کا معاہدہ کیا تھا، اور کہا تھا کہ ادائیگی منزل پر پہنچنے کے بعد ہی لی جائے گی۔ تاہم بعد میں مختلف بہانوں سے 25 لاکھ روپے ایڈوانس لے لیے گئے۔
پیسہ دینے کے بعد کچھ ہی عرصے میں یوراج سے گھر والوں کا رابطہ ٹوٹ گیا۔ چند مہینوں بعد انہیں ایک ویڈیو موصول ہوئی جس میں یوراج اور پنجاب کے ایک نوجوان کو گواتیمالا میں یرغمال بنا کر فرش پر منہ کے بل لٹایا گیا تھا اور اسمگلرز انہیں مارتے اور تھپڑ مارتے دکھائی دے رہے تھے۔
کلدیپ نے بتایا کہ اسمگلرز پستول بھر کر دونوں نوجوانوں کو قتل کی دھمکیاں دے رہے تھے اور یوراج کی رہائی کے بدلے تقریباً 17.5لاکھ روپے کا مطالبہ کر رہے تھے۔
اپنے آخری پیغام میں یوراج روتے ہوئے کہتا ہے:
پاپا جی، انہوں نے ہمیں یرغمال بنا لیا ہے۔ وہ ہمیں بہت مار رہے ہیں۔ وہ ہمیں مار ڈالیں گے… براہِ کرم پیسے بھیج دیں، نہیں تو وہ ہمیں قتل کر دیں گے۔
مارچ میں یوراج کے اہلِ خانہ نے کیتھل کے ایس پی سے ملاقات کی اور ایجنٹس کے خلاف کارروائی اور بیٹے کو بحفاظت واپس لانے کا مطالبہ کیا۔
بعد میں گھر والوں کا رابطہ ایک نیپالی اسمگلر پال سے ہوا، جس نے بتایا کہ یوراج کو مار دیا گیا ہے۔ جب گھر والوں نے ثبوت مانگا تو اس نے پیسے مانگے۔ گھر والوں نے اسے 1500 امریکی ڈالر بھیجے، جس کے بعد اس نے لاش کی تصاویر اور ڈیتھ سرٹیفکیٹ بھیج دیا۔
یوراج کے چچا کُلوَنت نے بتایا کہ ہریانہ کے تین ایجنٹس — دیویندر چیم، نورجوت دُشین، اور نوین عرف نیتو عرف مائیکل — اس پورے نیٹ ورک میں شامل تھے۔ ان کے مطابق نوین، جو کرکشیترہ کے حسن پور گاؤں کا رہنے والا ہے، اس سازش کا ماسٹر مائنڈ ہے۔
یوراج کی ماں سربجیت کور نے روتے ہوئے کہا:
اب سب کچھ تباہ ہوگیا ہے… زندگی سے ساری امید ختم ہوگئی ہے، میرا سہارا ہمیشہ کے لیے چلا گیا۔ نےجن سب نے یہ سب کیا، خدا انہیں کبھی معاف نہیں کرے گا۔
