پاکستان اور روس سے متعلق معاملات پر بھارت اور پولینڈ کے درمیان سفارتی اختلافات شدت اختیار کر گئے۔ بھارتی وزیر خارجہ ایس جے شنکر نے پولینڈ کے پاکستان سے بڑھتے روابط پر سخت تحفظات کا اظہار کرتے ہوئے کہا ہے کہ پولینڈ کو خطے میں دہشت گردی کو “ہوا دینے” سے گریز کرنا چاہیے، جبکہ پولینڈ کے وزیر خارجہ اور نائب وزیر اعظم راڈوسواف سِکوراسکی نے روس میں ہونے والی فوجی مشقوں میں بھارت کی شرکت کو “تشویشناک اور خطرناک” قرار دیا ہے۔
یہ صورتحال پیر 19 جنوری 2026 کو نئی دہلی میں دونوں ممالک کے وزرائے خارجہ کے درمیان ہونے والی ملاقات کے دوران سامنے آئی، جہاں پاکستان اور روس کے معاملات پر کھل کر اختلافی مؤقف اختیار کیا گیا۔
مذاکرات کے آغاز پر ایس جے شنکر نے پولینڈ کے وزیر خارجہ کے حالیہ دورۂ پاکستان کی طرف اشارہ کرتے ہوئے کہا کہ بھارت اپنے دوست ممالک سے توقع رکھتا ہے کہ وہ خطے میں دہشت گردی کے ڈھانچے کو مضبوط بنانے میں کسی قسم کا کردار ادا نہ کریں۔
انہوں نے کہا:“پولینڈ کو دہشت گردی کے معاملے میں زیرو ٹالرنس کی پالیسی اپنانی چاہیے اور ہمارے پڑوس میں دہشت گردی کو فروغ دینے سے اجتناب کرنا چاہیے۔”
بھارتی وزیر خارجہ کا اشارہ پولینڈ کے وزیر خارجہ کے اکتوبر 2025 میں پاکستان کے دورے کی جانب تھا، جہاں انہوں نے پاکستانی اعلیٰ قیادت سے ملاقاتیں کی تھیں۔ یہ دورہ مئی 2025 میں ہونے والے پاک بھارت کشیدہ حالات کے چند ماہ بعد ہوا تھا، جس پر نئی دہلی پہلے ہی ناراضی کا اظہار کر چکا تھا۔
دوسری جانب پولینڈ کے وزیر خارجہ راڈوسواف سِکوراسکی نے ملاقات کے بعد میڈیا سے گفتگو کرتے ہوئے کہا کہ دونوں ممالک کے درمیان بات چیت “دو ٹوک اور واضح” رہی۔ ان کا کہنا تھا کہ دہشت گردی کے مسئلے پر دونوں ملکوں کے خیالات ملتے جلتے ہیں، تاہم روس اور بیلاروس میں ہونے والی “زاپاد 2025” فوجی مشقوں میں بھارت کی شرکت پولینڈ اور یورپ کے لیے باعثِ تشویش ہے۔
انہوں نے کہا:“ہر ملک کو اپنے خطے اور پڑوسی ممالک کے حوالے سے خدشات ہوتے ہیں۔ دہشت گردی پر ہم متفق ہیں، لیکن بھارت کی روسی فوجی مشقوں میں شمولیت ہمیں خطرناک محسوس ہوتی ہے۔”
مذاکرات کے دوران روس سے بھارت کی تیل درآمدات کا معاملہ بھی زیربحث آیا۔ ایس جے شنکر نے یورپی یونین کی جانب سے بھارتی کمپنیوں اور روسی تیل کی تجارت پر پابندیوں کو “منتخب طور پر بھارت کو نشانہ بنانے” کے مترادف قرار دیا اور کہا کہ یہ رویہ ناانصافی اور غیر منصفانہ ہے۔
انہوں نے کہا:“بھارت کو بار بار نشانہ بنانا نہ صرف ناانصافی ہے بلکہ اس کا کوئی جواز بھی نہیں بنتا۔”رپورٹس کے مطابق بھارت کو پولینڈ کے وزیر خارجہ کے حالیہ طنزیہ بیانات پر بھی شدید تحفظات ہیں جن میں انہوں نے کہا تھا کہ بھارت کی جانب سے روسی تیل کی خریداری میں کمی “پوٹن کی جنگی مشین کو مالی نقصان” پہنچا رہی ہے۔
یہ سفارتی کشیدگی ایک ایسے وقت میں سامنے آئی ہے جب بھارت اور پولینڈ کے تعلقات حالیہ برسوں میں بہتر ہوئے ہیں اور دونوں ممالک کے درمیان تجارت بڑھ کر 7 ارب ڈالر تک پہنچ چکی ہے، جو گزشتہ دس برسوں میں 200 فیصد اضافہ ظاہر کرتی ہے۔ دونوں ممالک براہ راست پروازوں، ٹیکنالوجی اور تجارتی تعاون کو مزید وسعت دینا چاہتے ہیں۔
پولینڈ کے نائب وزیر اعظم کا یہ دورہ یورپی رہنماؤں کے سلسلہ وار دوروں کا حصہ ہے، جن میں جرمنی کے چانسلر اور فرانس کے قومی سلامتی کے مشیر بھی شامل ہیں۔ یہ تمام دورے آئندہ ہفتے ہونے والے یورپی یونین۔بھارت سربراہی اجلاس اور یومِ جمہوریہ کی تقریبات سے قبل ہو رہے ہیں۔
بھارتی وزارت خارجہ کے حکام نے اس بات کی تصدیق یا تردید نہیں کی کہ آیا پولینڈ اور یورپی یونین کی جانب سے بھارت کو “منتخب طور پر نشانہ بنانے” کا معاملہ آئندہ ہفتے یورپی قیادت کے ساتھ ملاقاتوں میں بھی اٹھایا جائے گا یا نہیں۔
