ٹائمز آف انڈیا کی رپورٹ کے مطابق امریکی ریاست جارجیا میں مبینہ خاندانی تنازع کے نتیجے میں ہونے والی فائرنگ کے واقعے میں ایک بھارتی شہری سمیت چار افراد ہلاک ہو گئے۔ حکام اور اٹلانٹا میں بھارتی قونصل خانے نے واقعے کی تصدیق کی ہے۔
یہ واقعہ لارنس وِل شہر میں پیش آیا، جہاں پولیس کو ایک رہائشی مکان میں فائرنگ کی اطلاع ملی۔ پولیس کے پہنچنے پر گھر کے اندر چار افراد گولیوں کے زخموں کے ساتھ مردہ پائے گئے، جنہیں موقع پر ہی ہلاک قرار دے دیا گیا۔
مقامی رپورٹس کے مطابق فائرنگ کے وقت گھر میں تین بچے بھی موجود تھے جن کی عمریں 7، 10 اور 12 سال تھیں۔ بچوں نے خود کو بچانے کے لیے ایک الماری میں چھپا لیا، جبکہ 12 سالہ بچے نے 911 پر کال کر کے پولیس کو اطلاع دی، جس کے نتیجے میں اہلکار چند منٹوں میں موقع پر پہنچ گئے۔ بچے محفوظ رہے اور بعد میں انہیں ایک رشتہ دار کے حوالے کر دیا گیا۔
ملزم کون ہے؟
پولیس نے ملزم کی شناخت 51 سالہ وجے کمار کے طور پر کی ہے، جو اٹلانٹا کا رہائشی ہے۔ اس پر چار افراد کے قتل، سنگین حملے (ایگریویٹڈ اسالٹ)، فیلونی مرڈر اور دانستہ قتل (مالس مرڈر) کے چار، چار الزامات عائد کیے گئے ہیں۔ اس کے علاوہ اس پر بچوں پر ظلم کے جرم میں ایک فرسٹ ڈگری اور دو تھرڈ ڈگری کے الزامات بھی لگائے گئے ہیں۔
ہلاک ہونے والوں میں وجے کمار کی اہلیہ 43 سالہ مینو ڈوگرا (اٹلانٹا کی رہائشی) اور اس کے تین رشتہ دار شامل ہیں: 33 سالہ گورو کمار، 37 سالہ ندھی چندر اور 38 سالہ ہریش چندر، جو سب لارنس وِل کے رہائشی تھے۔
واقعہ کیسے پیش آیا؟
تحقیقات کرنے والے حکام کے مطابق وجے کمار اور اس کی بیوی مینو ڈوگرا کے درمیان اٹلانٹا میں واقع ان کے گھر پر کسی بات پر جھگڑا ہوا، جس کے بعد وہ اپنے 12 سالہ بچے کے ساتھ بروک آئیوی کورٹ میں واقع اس گھر پہنچے جہاں باقی تین افراد دو بچوں کے ساتھ رہائش پذیر تھے۔
گوینیٹ کاؤنٹی پولیس کی کارپورل اینجلا کارٹر کا کہنا ہے کہ فی الحال یہ معلوم نہیں ہو سکا کہ جھگڑا کس بات پر ہوا، وہ اس گھر کیوں گئے، یا واقعے سے پہلے کیا کچھ پیش آیا۔ان کا کہنا تھا کہ یہ انتہائی افسوسناک صورتحال ہے ،ایک ہی وقت میں چار افراد کی موت، خاص طور پر جب گھر میں بچے موجود ہوں، بہت ہی المناک ہے۔
بھارتی قونصل خانے کا ردعمل
اٹلانٹا میں بھارتی قونصل خانے نے واقعے پر گہرے دکھ اور افسوس کا اظہار کیا اور بتایا کہ ملزم کو گرفتار کر لیا گیا ہے۔قونصل خانے نے سوشل میڈیا پلیٹ فارم ایکس پر جاری بیان میں کہا کہ ہم مبینہ خاندانی تنازع سے جڑے اس افسوسناک فائرنگ کے واقعے پر گہرے رنج و غم کا اظہار کرتے ہیں، جس میں ایک بھارتی شہری بھی جان سے گیا۔ ملزم کو گرفتار کر لیا گیا ہے اور متاثرہ خاندان کو ہر ممکن مدد فراہم کی جا رہی ہے۔
