فرزانہ علی خان کی رپورٹ :
ضلع اورکزئی کے علاقے غلجو میں سیکیورٹی کی غیر یقینی اور کشیدہ صورتحال کے باعث گورنمنٹ گرلز ہائر سیکنڈری اسکول اور گورنمنٹ بوائز ڈگری کالج عملاً غیر فعال ہو چکے ہیں، جس کے نتیجے میں طلبہ کو شدید تعلیمی مشکلات کا سامنا ہے اور تعلیمی سرگرمیاں بری طرح متاثر ہو رہی ہیں۔
ڈپٹی کمشنر اورکزئی عرفان الدین کی ہدایت پر اسسٹنٹ کمشنر اپر شاہ نواز خان اور ایڈیشنل اسسٹنٹ کمشنر اپر محمد عارف خان نے دونوں تعلیمی اداروں کا تفصیلی دورہ کیا۔ دورے کے دوران افسران نے اداروں میں دستیاب سہولیات، تدریسی ماحول اور انتظامی امور کا باریک بینی سے جائزہ لیا، جبکہ عملے کی حاضری رجسٹرز بھی چیک کیے گئے تاکہ مسائل کی نشاندہی کر کے فوری بہتری کے اقدامات کیے جا سکیں۔
معائنے کے دوران گورنمنٹ بوائز ڈگری کالج غلجو کی صورتحال انتہائی تشویشناک پائی گئی۔ تدریسی عملے کی مکمل غیر حاضری سامنے آئی جبکہ پرنسپل کی جانب سے مؤثر قیادت کا فقدان بھی واضح نظر آیا، جس پر افسران نے سخت برہمی کا اظہار کیا۔ کالج کی لیبارٹریاں غیر فعال اور خالی پائی گئیں، جبکہ پورا کیمپس ویران منظر پیش کر رہا تھا اور ایک بھی طالب علم موجود نہیں تھا۔ موقع پر صرف دو چوکیدار ڈیوٹی انجام دے رہے تھے۔
افسران نے متعلقہ حکام کو ہدایت کی کہ تعلیمی اداروں کی فعالیت بحال کرنے، عملے کی حاضری یقینی بنانے اور طلبہ کو درپیش مسائل کے فوری حل کے لیے ہنگامی بنیادوں پر اقدامات کیے جائیں، تاکہ علاقے میں تعلیمی نظام کو دوبارہ فعال بنایا جا سکے۔
