چین کی مختلف یونیورسٹیوں کے اساتذہ اور طالب علموں نے خوبصورت اردو زبان میں اپنے ویڈیو پیغامات کے ذریعے پاکستان کے لیے نیک خواہشات کا اظہار کیا ہے۔
بیجنگ فارن یونیورسٹی شعبہ اردو میں پڑھانے والی نسرین نے اپنے ویڈیو پیغام میں کہا کہ پاکستان نے کورونا وباء کے دوران چین عوام کی بہت مدد کی ہے جس پر چینی عوام بہت متاثر ہے۔
انہوں نے کہا کہ ہمیں افواہوں کے بجائے سائنسی علم ، ڈاکٹروں اور حکومت پر بھروسہ کرنا چاہیے تاکہ صحیح طریقوں کے ذریعے ہم اس وباء کو شکست دے سکیں۔
بیجنگ فارن یونیورسٹی کی طالب علم زویا نے ویڈیو پیغام میں کہا کہ چینی حکومت کے اقدامات سے کورونا وباء پر قابو پالیا گیا ہے ،بدقسمتی سے یہ وباء پاکستان سمیت پوری دنیا میں پھیل رہی ہے۔
زویا نے پاکستانی عوام سے اپیل کی کہ آپ حکومتی ہدایات پر عمل کریں، امید ہے پاکستان جلد اس وباء کو شکست دے گا۔
بیجنگ فارن یونیورسٹی شعبہ اردو کے ایک اور طالب علم جنید نے کورونا وائرس کے مقابلے کے لیے اپنے تجربات شیئر کرتے ہوئے بتایا کہ اس وباء کے دوران وہ گھر سے باہر نہیں نکلے۔
انہوں نے کہا کہ گروسری کے لیے گھر سے ایک فرد باہر جاتا تھا، حکومت نے جوبات ہمیں بتائی ہم نے اس پر عمل کیا جس کی وجہ سے چین کورونا وائرس پر قابو پانے میں کامیاب ہوگیا ہے۔
چین کے 21 سالہ کورونا مریض ٹائیگر یی کی کہانی، جسے زندگی موت سے واپس چھین لائی
کورونا وائرس کے متعلق چین میں موجود پاکستانی طالب علم کی ویڈیو وائرل ہو گئی
اپنے پیغام میں انہوں نے پاکستانیوں کو مخاطب کرتے ہوئے کہا کہ آپ کو گھر سے باہر نہیں جانا چاہیے، اپنے ہاتھ بار بار دھوئیں۔
انہوں نے کہا کہ امید ہے کوششوں کے ذریعے آپ کورونا وائرس کیخلاف ضرور کامیاب ہوں گے۔
بیجنگ فارن یونیورسٹی شعبہ اردو کے مزید طلباء نے بھی پاکستان میں کورونا وباء کے پھیلاؤ کے وقت یکجہتی کا اظہار کرتے ہوئے پاکستانی عوام کو اس وباء پر قابو پانے کے لیے مفید مشورے دیے ہیں ۔
