مائیکروسافٹ کے بانی اور دنیا کے امیر ترین افراد میں شامل بل گیٹس نے کہا ہے کہ چین نے کورونا وبا کے آغاز میں بہت کچھ ٹھیک طریقے سے کیا ہے جبکہ امریکہ نے دیگر ممالک کی نسبت اس کا مقابلہ بری طرح سے کیا ہے۔
انہوں نے کہا کہ چین کے متعلق بہت سی غلط اور غیرمنصفانہ باتیں کہی گئی ہیں لیکن اس بارے میں بات کرنے کا یہ موقع نہیں ہے۔
سی این این سے بات کرتے ہوئے بل گیٹس کا کہنا تھا کہ چین پر کورونا کے متعلق جھوٹ بولنے اور اسے چھپانے کے الزامات کا مقصد اپنی غلطیوں سے توجہ ہٹانا ہو سکتا ہے۔
دنیا کے 11 لوگ جنہوں نے برسوں پہلے کورونا کی پیش گوئی کر دی تھی
بل گیٹس اور بارک اوبامہ نے کئی برس پہلے وبا کا خطرہ کن الفاظ میں ظاہر کیا تھا؟
انہوں نے کہا کہ بہت سے ممالک نے کورونا کے چیلنج کا فوری جواب دیا اور تیزی سے حرکت میں آئے، انہوں نے ٹیسٹنگ کا آغاز بھی جلدی سے کیا اور ناقابل یقین معاشی نقصان سے بھی محفوظ رہے۔
بل گیٹس کے مطابق یہ بات افسوسناک ہے کہ امریکہ کے متعلق یہ توقع کی جاتی تھی کہ وہ بہتر کارکردگی کا مظاہرہ کرے گا مگر اس نے خصوصی طور پر بری کارکردگی دکھائی۔
انہوں نے اس سے قبل عالمی ادارہ صحت کا دفاع بھی کیا تھا جس پرچین کے متعلق نرم رویہ رکھنے کا الزام لگایا جاتا ہے۔
ان کا کہنا تھا کہ آگے چل کر ہم کہہ سکتے ہیں کہ ڈبلیو ایچ او اس سے بہتر کر سکتا تھا لیکن اس ادارے نے شاندار کام کیا ہے اور امریکہ کا اس پر بہت انحصار ہے۔
انہوں نے کہا کہ عالمی ادارہ صحت سب سے زیادہ امریکہ سے جڑا ہوا ہے، اس میں سی ڈی سی کے موجودہ اور سابقہ اہلکار موجود ہیں۔
امریکہ اور دیگر ممالک سے ایسی آوازیں سامنے آئی ہیں جن میں کہا گیا تھا کہ کورونا وائرس عملے کی غفلت کے باعث ووہان کی لیبارٹری سے باہر آ گیا تھا۔
کئی اعلیٰ عہدیداروں نے اس حوالے سے چین پر حقیقت چھپانے کا الزام بھی عائد کیا تھا، صدر ٹرمپ نے کورونا کے پھیلاؤ میں چینی حکومت کے کردار کی تحقیقات کرنے کی بات کی تھی۔
چین نے ان تمام الزامات کی تردید کی ہے جبکہ بہت سی حکومتوں اور بین الاقوامی ایجنسیوں نے بھی کہا ہے کہ ان باتوں میں کوئی سچائی نہیں ہے۔
سائنسدانوں میں بالعموم اتفاق پایا جاتا ہے کہ کورونا وائرس چمگادڑوں سے شروع ہوا۔
کورونا کا پھیلاؤ: امریکی ریاست نے چین کے خلاف مقدمہ دائر کر دیا
کورونا وبا سے چین میں امریکہ سے زیادہ اموات ہوئی ہیں، صدر ٹرمپ کا دعویٰ
صدر ٹرمپ، ریپبلکن پارٹی کے عہدیداروں اور ان کے حمایتیوں نے چین اور عالمی ادارہ صحت پر مسلسل الزامات کی بوچھاڑ کیے رکھی ہے، امریکی صدر نے ڈبلیو ایچ او کو فنڈز کی فراہمی روک دینے کا اعلان بھی کیا تھا۔
بل گیٹس نے صدر ٹرمپ کے اس اعلان کو شدید تنقید کا نشانہ بنایا تھا، ان کی اہلیہ نے رائٹرز سے بات کرتے ہوئے کہا کہ وبا کے دوران عالمی ادارہ صحت کی امداد بند کرنے کا فیصلہ سمجھ سے بالاتر ہے، ہمیں عالمی سطح پر اجتماعی طور پر کام کرنے کی ضرورت ہے۔
اتوار کے روز تک امریکہ میں 9 لاکھ 87 ہزار سے زائد کورونا کے مصدقہ مریض سامنے آ چکے تھے جبکہ اموات کی تعداد 55 ہزار 5 سو تک پہنچ چکی تھی۔
