میڈیکل اسٹاف اور مریضوں میں کورونا وائرس کی تشخیص کے باعث مقامی انتظامیہ نے گجرات میں دو مراکز صحت سیل کر دیے ہیں۔ گورنمنٹ میٹرنٹی اسپتال گجرات اور بنیادی مرکز صحت فتح پور سیل ہونیوالوں میں شامل ہیں۔
گزشتہ چند دنوں میں ضلع گجرات میں تین سو کے قریب حاملہ خواتین کے کورونا وائرس ٹیسٹ کیے گئے جن میں سے 28 کا رزلٹ پازیٹو آیا ہے جبکہ دو سو خواتین کے کورونا ٹیسٹ رزلٹ کا انتظار کیا جارہا ہے۔
رپورٹ کے مطابق گورنمنٹ میٹرنٹی اسپتال گجرات میں حاملہ خواتین میں کورونا وائرس انفیکشن کی شرح خطرناک حد تک زیادہ تھی جس کی وجہ سے اسے سیل کیا گیا۔
ہیلتھ ڈیپارٹمنٹ نے جمعرات کے روز میٹرنٹی اسپتال کے اسٹاف اور ڈاکٹرز کے سیمپل حاصل کیے جہاں طبی سہولیات کی فراہمی پہلے ہی معطل ہے۔ فتح پور میں انتظامیہ نے بنیادی مرکز صحت کے میڈیکل آفیسر کے پرائیویٹ کلینک کو بھی سیل کر دیا ہے۔
تین سیلزمینوں کے رزلٹ پازیٹو آنے پر انتظامیہ نے بھمبر روڈ پر گروسری سٹورز بھی بند کر دیے ہیں۔ مسلم بازار کی ایک بیکری میں کام کرنیوالے دو سیلزمینوں کے کورونا ٹیسٹ بھی پازیٹو آئے ہیں تاہم بیکری کو سیل نہیں کیا گیا۔
ڈان کے مطابق ضلع کی مقامی انتظامیہ نے جی ٹی روڈ پر کھاریاں اور لالہ موسیٰ کے مقام پر ٹرک ہوٹلز اور بڑے گروسری سٹورزپر نمونے لے کر لیبارٹری بھجوا دیے ہیں۔
