پاکستان ٹیلی وژن کے تین معروف اداکاروں، یاسر نواز، ندا یاسر اور نوید رضا میں کورونا وائرس کی تصدیق ہو گئی ہے۔
پاکستان شوبز انڈسٹری میں لاک ڈاؤن کے دوران بھی بڑی حد تک کام جاری رہا، اب ٹی وی اداکارہ اور مارننگ شو کی میزبان ندا یاسر، ان کے شوہر یاسر نوازاور ایک اور اداکار نوید رضا میں کورونا کی تصدیق ہو گئی ہے۔
ندا یاسر نے ڈان سے بات کرتے ہوئے کہا کہ ان کی بیٹیوں میں بھی کورونا کی تصدیق ہوئی ہے، ان میں خود کوئی علامات ظاہر نہیں ہوئیں تاہم ان کے شوہر کو بخار تھا جبکہ بیٹے کا ٹیسٹ منفی آیا ہے۔
ندا کا کہنا تھا کہ ان کے عملے کے افراد کا ٹیسٹ بھی منفی آیا ہے۔
یہ بات کہی جا رہی ہے کہ ندا یاسر کے مارننگ شو میں پاکستانی ڈرامے ‘میرا دل میرا دشمن’ کے اداکار شریک ہوئے تو ان میں بھی کورونا وائرس منتقل ہو گیا۔
اس ڈرامے میں نوید رضا کام کر رہے ہیں، ان کے ساتھ یاسر نواز، ایلیزے شاہ، نعمال سمیع اور انعم تنویر بھی ڈرامے کی کاسٹ میں شامل ہیں۔
نوید رضا نے اس حوالے سے بات کرتے ہوئے کہا کہ انہوں نے سب کو لیب سے ٹیسٹ کرانے کا کہا تھا، سیٹ پر کوئی ایسا شخص ضرور موجود تھا جو کورونا کا شکار تھا۔
ایک فیس بک پوسٹ کے ذریعے انعم تنویر نے بتایا کہ ان کا کورونا ٹیسٹ منفی رہا ہے، انہوں نے درخواست کی کہ اس حوالے سے غلط اطلاعات شائع کرنے سے گریز کیا جائے۔
