لاہور سے تعلق رکھنے والی معروف اداکارہ اور کمپیئر عائشہ ثناء کے خلاف بوگس چیک دینے کا مقدمہ درج کر لیا گیا ہے، اداکارہ 15 روز سے روپوش ہیں اور ابھی تک پولیس انہیں گرفتار نہیں کر سکی۔
27 مئی کو تھانہ ڈیفنس بی میں ان کے خلاف بوگس چیک کا مقدمہ درج ہوا تھا، میاں محمد علی معین نے الزام لگایا تھا کہ اداکارہ نے ان سے 20 لاکھ روپے قرض لیا تھا۔
مدعی کا کہنا ہے کہ عائشہ ثناء نے انہیں قرض واپسی کی ضمانت کے طور پر چیک دیا تھا جو باؤنس ہو گیا ہے۔
تفتیشی حکام کا کہنا ہے کہ ملزمہ کے خلاف مقدمہ درج ہے جس کے بعد وہ روپوش ہیں، انہوں نے نہ ہی عدالت سے ضمانت کرائی ہے اور نہ ہی وہ شامل تفتیش ہوئی ہیں۔
یاد رہے کہ گزشتہ دنوں سینیٹ میں ایک بل منظور ہوا تھا جس میں تعزیرات پاکستان میں ترمیم کرتے ہوئے بوگس چیک دینے والوں کے لیے اصل رقم سے دگنا پیسے اور تین سال تک قید کی سزا تجویز کی گئی تھی۔
