سیاست، انٹرٹینمنٹ اور ٹیکنالوجی کی بڑی شخصیات کے ٹویٹر اکاؤنٹس ہیک ہو گئے ہیں۔
ان شخصیات میں بارک اوبامہ، جیف بیزوس، بل گیٹس، ایلان مسک، جوزف بائیڈن جونیئر اور دیگر کئی اہم شخصیات شامل ہیں۔
ان تمام افراد کے اکاؤنٹس سے کرپٹوکرنسی کے متعلق میسج سامنے آ رہے ہیں جن میں لوگوں کو ایک مخصوص اکاؤنٹ میں بٹ کوائن بھیجنے کی صورت میں اسے دگنا کرنے کا وعدہ کیا گیا ہے۔
جن دیگر اہم شخصیات کے اکاونٹ ہیک کیے گئے ہیں ان میں وارن بفیٹ، ریپر کانیے ویسٹ اور نیویارک کےسابق گورنر مائیکل بلوم برگ بھی شامل ہیں۔
اطلاعات کے مطابق اب تک 300 افراد اس فراڈ کا شکار ہو کر ایک لاکھ ڈالر سے زائد رقم سے ہاتھ دھو بیٹھے ہیں۔ بعد ازاں ان میں سے زیادہ تر ٹویٹس ہٹا لی گئی ہیں۔
اس سے قبل نمایاں شخصیات کے جعلی اکاؤنٹس بنا کر یہ فراڈ کیا جاتا تھا، یہ پہلی مرتبہ ہوا ہے کہ حقیقی اکاؤنٹس ہیک کر کے اتنے بڑے پیمانے پر فراڈ کیا گیا ہے۔
ٹویٹر نے اپنے ایک پیغام میں کہا ہے کہ وہ اس مسئلے کی تحقیق کر کے اسے حل کرنے کی کوشش کر رہے ہیں۔ اس واقعہ نے کمپنی کے شئیر دو اعشاریہ تین فیصد گرادیے ہیں۔
