پاکستان پیپلزپارٹی کے رہنماء قمر زمان کائرہ نے کہا ہے کہ حکومت سے جان چھڑانا وقت کی اہم ضرورت ہے، اس لیے عید الاضحیٰ کے بعد قیادت کی سطح پر آل پارٹیز کانفرنس منعقد کی جائے گی۔
پاکستان پیپلزپارٹی اور مسلم لیگ ن کے وفود میں ملاقات کے بعد پریس کانفرنس سے خطاب کرتے ہوئے انہوں نے کہا کہ اپوزیشن مشترکہ کمیٹی بنائے گی جو مختلف جماعتوں سے رابطہ کرے گی۔
انہوں نے اعتراف کیا کہ اپوزیشن کی کارکردگی عوامی توقعات کے مطابق نہیں ہے، کوشش کر رہے ہیں کہ عوام کی امنگوں پر پورا اتریں۔
قمر زمان کائرہ کا کہنا تھا کہ حکومت نے ملک کو بحرانوں سے دوچار کیا، نیب کا ادارہ اپوزیشن کے خلاف مختلف ہتھکنڈے استعمال کر رہا ہے، دن بدن نیب نیازی گٹھ جوڑ واضح ہوتا جا رہا ہے۔
انہوں نے کہا کہ کوئی ایسا اپوزیشن رہنما نہیں جس کے خلاف نیب نے الزامات نہ عائد کیے ہوں، حمزہ شہباز پر بھی بےبنیاد الزامات عائد کیے گئے ہیں۔
اس موقع پر پاکستان مسلم لیگ ن کے رہنماء احسن اقبال نے کہا کہ حکومت نے ملک کو معاشی بحران میں دھکیل دیا ہے، اس وقت اندورنی اتحاد کی ضرورت ہے مگر حکومت انتقامی کارروائی کر رہی ہے۔
انہوں نے کہا کہ ملک میں آئینی حکمرانی کا نظام ملیا میٹ کیا جا رہا ہے، حکومت کو مزید گنجائش دینے کا مقصد مسائل کو فروغ دینا ہو گا۔
ان کا کہنا تھا کہ نااہل حکومت سے نجات حاصل کرنا پاکستان کے عوام کی ترجمانی ہے، کورونا حکومت کے لیے آکسیجن بن گئی ہے، حکومت سے نجات کے لیے لائحہ عمل طے کریں گے، اس لیے اے پی سی بلا رہے ہیں۔
احسن اقبال نے کہا کہ مقبوضہ کشمیر سے متعلق خارجہ پالیسی موثر ثابت نہیں ہو سکی، ہم دہشت گردی کے خلاف ہیں، ایسا قانون لایا جا رہا ہے جو وزیر داخلہ کے تابع ہو گا۔
