وزیر اعظم کے معاون خصوصی زلفی بخاری نے پاکستان ٹورازم ڈویلپمنٹ کارپوریشن کے لیے نئی بھرتیوں کا اعلان کیا ہے۔
سماجی رابطہ کی ویب سائیٹ ٹویٹر پر اپنے ایک پیغام میں انہوں نے خواہش مند افراد کو آن لائن اپلائی کرنے کے لیے لنک شیئر کیا ہے، ان کا کہنا ہے کہ سیاحت کے شعبہ میں بہتری کے لیے نئی بھرتیاں کی جا رہی ہیں۔
نئی پوسٹس میں جنرل منیجر، منیجرز، اسسٹنٹ منیجرز اور کوارڈینیٹرز کی پوسٹس شامل ہیں۔
گزشتہ روز اسلام آباد میں صحافیوں سے گفتگو میں زلفی بخاری نے واضح کیا تھا کہ پی ٹی ڈی سی ڈاﺅن سائزنگ واپس نہیں ہو گی، بہتر ہے پی ٹی ڈی سی ملازمین گولڈن ہینڈ شیک لیں، توڑ پھوڑ احتجاج سے پی ٹی ڈی سی اصلاحات نہیں رکیں گی ۔
زلفی بخاری کی جانب سے جاری کیے گئے ٹویٹر پیغام پر صارفین نے شدید ردِ عمل کااظہار کیا ہے ۔ ایک صارف نے تحریر کیا کہ تین ہفتے پہلے پی ٹی ڈی سی کے تمام مستقل ملازمین کو فارغ کر دیا ،جس کی وجہ یہ بتائی گئی کہ ادارہ خسارے میں ہے۔
انہوں نے پوچھا کہ اب تین ہفتے میں ایسا کیا جادو ہوگیا کہ پی ٹی ڈی سی نے پہلے سے بھی مہنگے ملازمین کو بھرتی کرنا شروع کر دیا ہے۔
ٹویٹر صارف فہیم خان نے لکھا کہ وہ اس حکومت کی پالیسیوں کو سمجھنے میں ناکام ہوگئے ہیں کہ ایک طرف پی ٹی ڈی سی کے سینکڑوں ملازمین کو نوکریوں سے نکال دیا گیا جبکہ دوسری جانب لوگوں کو بھرتی کیا جا رہا ہے ۔
شیراز اسرار نے سوال اٹھایا کہ ٹورازم کی پروموشن کے لیے انفراسٹرکچر کی تعمیر پر ابھی تک کیا کام کیا گیا ہے۔ متعدد صارفین نے ا لزام لگایا کہ نئی جابز کے لیے اہلیت کا جو معیار مقرر کیا گیا ہے وہ امتیازی ہے ۔
