بلاول کا چیئرمین نیب سے استعفیٰ کا مطالبہ، لانگ مارچ کا عندیہ

پاکستان پیپلزپارٹی کے چیئرمین بلاول بھٹو زرداری نے چیئرمین نیب سے استعفیٰ کا مطالبہ کرتے ہوئے کہا ہے کہ یہ ایک غیر آئینی ادارہ ہے، اسے تالا لگائیں اور گھر جائیں۔

انہوں نے کہا کہ پہلے صرف ہم کہتے تھے مگر اب عدلیہ نے بھی کہہ دیا ہے، نیب کو ختم کرنے کے لیے تمام اسٹیک ہولڈرز کو اکٹھا ہونا چاہیئے۔

انہوں نے الزام عائد کیا کہ حکومت کے میگا اسکینڈلز پر نیب ایکشن نہیں لے رہا، بلاتفریق احتساب کیلئے سب کو مل کر قانون سازی کرنا ہو گی۔

بلاول بھٹو نے بتایا کہ ان کی شہبازشریف سے آج بھی ٹیلی فون پر بات ہوئی ہے، مریم نواز سے بھی رابطہ رہتا ہے۔

انہوں نے کہا کہ عید کے بعد شہباز شریف کی صحتیابی پر کل جماعتی کانفرنس بلائی جائے گی، شہبازشریف اے پی سی کی قیادت کریں تو زیادہ بہتر ہو گا، مڈٹرم الیکشن یا پارلیمنٹ میں نئی حکومت دونوں آپشنز زیرغور ہیں۔

ان کے مطابق ٹرانسپرنسی انٹرنیشنل نے کہا ہے کہ یہ پاکستان کی کرپٹ ترین حکومت ہے، کیا آج بھی کرپشن کی ذمہ داری ن لیگ اور پیپلزپارٹی ہے؟

چیئرمین پیپلزپارٹی کا کہنا تھا کہ وفاق نے پاکستانیوں کی معیشت اور زندگی خطرے میں ڈال دی، پی ٹی آئی کے پاس حکومت میں رہنے کا جواز نہیں رہا۔

انہوں نے مزید کہا کہ مائنس ون اپوزیشن کی طرف سے نہیں ہوتا، یہ بات وزیراعظم کے منہ سے نکلی ہے، اس کٹھ پتلی حکومت کو چلاتے رہے تو مزید نقصان ہو گا۔

بلاول بھٹو نے کہا کہ میں نے ابھی عوام کو کال نہیں دی، احتجاج سمیت بہت سی تجاویز زیرغور ہیں، ہم لانگ مارچ کریں گے تو  وہاں بھی لوگ احتیاطی تدابیر اپنائیں گے۔

انہوں نے حیرت کا اظہار کیا کہ پنجاب میں سب سے بڑی جماعت ن لیگ کی ہے مگر حکومت پی ٹی آئی کی ہے۔

پیپلزپارٹی کے چیئرمین نے کہا کہ اسمبلیوں سے استعفیٰ کی فضل الرحمان کی تجویز مانی جاتی تو میں پارلیمنٹ کا حصہ ہوتا نہ ہی سلیکٹڈ کا پردہ فاش ہوتا۔

انہوں نے اس عہد کا اعادہ کیا کہ پیپلز پارٹی جمہوریت کا ہر صورت حصہ رہےگی، اے پی سی کے ایجنڈے پر مشاورت کررہے ہیں۔

انہوں نے یاد دلایا کہ پیپلزپارٹی نے 1997 میں 17 سیٹوں کے ساتھ مزاحمت کی تھی، نوازشریف اس لیے امیرالمومنین نہیں بن پائے کیونکہ بےنظیر بھٹو نے مزاحمت کی تھی۔

انہوں نے الزام لگایا کہ وزیراعظم عمران خان کا کچن چلانے کیلئے کرپشن کی جا رہی ہے، پی ٹی آئی والے خود کہہ رہے ہیں کہ پنجاب میں کرپشن ہو رہی ہے۔

بلاول بھٹو زرداری نے مطالبہ کیا کہ خورشید شاہ سمیت نیب کے تمام قیدیوں کو رہا کیا جائے۔