وزیراعظم کے مشیر شہزاد اکبر کا آغا افتخار کی ویڈیو سے لاتعلقی کا اظہار

جسٹس قاضی فائز عیسیٰ کے خلاف دھمکی آمیز ویڈیو کے حوالے سے ایف آئی اے نے تحقیقات مکمل کر لی ہیں جن کے مطابق وزیر اعظم کے مشیر مرزا شہزاد اکبر نے ویڈیو سے اظہار لاتعلقی کیا ہے۔

سپریم کورٹ میں جمع کرائی گئی رپورٹ میں ایف آئی اے نے کہا ہے کہ مرزا شہزاد اکبر تحقیقات میں شامل ہوئے اور اپنا بیان ریکارڈ کرایا۔

ایف آئی اے کے مطابق  آغا افتخارالدین مرزا کے 486 افراد سے روابط تھے جن میں سویلین اور ریٹائرڈ آرمی افسران شامل ہیں جبکہ ایران سعودی عرب، ساؤتھ کوریا، ملائشیا، چین، زمبیا اور برطانیہ میں مقیم افراد کے ساتھ بھی ان کے روابط تھے۔

آغا افتخار کی سپریم کورٹ سے توہین عدالت کی کارروائی موخر کرنے کی درخواست

جسٹس عیسیٰ کی اہلیہ نے حلف نامے میں 24 سوال پوچھ لیے

ایف آئی اے نے رپورٹ میں بتایا ہے کہ ان کے روابط کا متنازعہ تقریر کے ساتھ کوئی تعلق سامنے نہیں آیا۔

رپورٹ میں کہا گیا ہے کہ صحافی عبدالوحید ڈوگر کا بھی بیان ریکارڈ کیا گیا جنہوں نے آغا افتخار الدین مرزا سے لاتعلقی کا اظہار کیا اور کہا کہ انہیں متنازعہ تقریر کی ویڈیو کے بارے میں اپنے ادارے کے واٹس ایپ گروپ سے معلوم ہوا۔

ملزم آغا افتخار اور ان کے اسسٹنٹ نے سوشل میڈیا پر 698 ویڈیو اپلوڈ کیں، اب تک 175 ویڈیوز کی جانچ کی جا چکی ہے جبکہ باقی ویڈیوز کی جانچ کا مرحلہ جاری ہے۔

ایف آئی اے نے مزید بتایا ہے کہ ملزم کے 19 بینک اکاؤنٹس کے ریکارڈ کا تجزیہ بھی کیا جا رہا ہے۔

ایف آئی اے کے مطابق کہوٹہ میں ہیون ویلی ہاؤسنگ سوسائٹی کے نام والے اکاؤنٹ کو ملزم خود چلا رہے تھے۔

ملزم کے بیٹے محمد مہدی کے مطابق سوسائٹی کا رقبہ 31 کنال پر مشتمل تھا جس میں سے زیادہ تر حصہ بیچ دیا گیا ہے اور اب انکے ملزم والد چند مرلے کے مالک ہیں۔

ریکارڈ کے مطابق اقرا پبلک سکول اینڈ کالج 2010 میں بنایا گیا اور 2018 تک 533 طلباء نے وہاں سے میٹرک اور انٹرمیڈیٹ کیا۔ بینک ریکارڈ کے مطابق 8 سالوں میں 6 کروڑ 4 لاکھ 37 ہزار روپے ٹرن اوور رہا۔

اسی طرح اقرا ویلفیئر آرگنائزیشن کے ریکارڈ کے مطابق 2001 سے 2016 تک تقریباً 15 لاکھ روپے ٹرن اوور رہا اور اس رقم کا ذریعہ چندہ ہے۔

الحسینی ٹرسٹ فلاحی کاموں کے سلسلے میں 2012 میں قائم ہوا اور اس کے ریکارڈ کے مطابق فروری 2019 تک تقریباً 43 لاکھ 50 ہزار روپے ٹرن اوور رہا اور اس رقم کا ذریعہ بھی چندہ ہی ہے۔

ایف آئی اے نے کہا ہے کہ ریکارڈ سے معلوم ہوا ہے کہ تمام چندہ پاکستان اور بیرون ملک سے اکٹھا ہوا ہے تاہم سب سے زیادہ رقوم متواتر آنے کے حوالے سے تحقیقات کی جا رہی ہیں۔

رپورٹ کے مطابق ملزم کا ایک بیٹا سعودی عرب میں جرمن آئل کمپنی میں کام کر رہا ہے جسکی ماہانہ تنخواہ 7500 امریکی ڈالر ہے اور اس تنخواہ سے گھر کے اخراجات اٹھائے جا رہے ہیں۔

ایف آئی اے نے کہا ہے کہ چیئرمین ایف بی آر سے ملزم کا ٹیکس ریکارڈ بھی طلب کیا جا رہا ہے۔

آغا افتخار نے متنازعہ تقریر میں جسٹس قاضی فائز عیسیٰ کے متعلق دھمکی آمیز گفتگو کی گئی تھی اور ججز کے خلاف انتہائی نازیبا الفاظ استعمال کیے تھے۔

متنازعہ تقریر کے بعد جج کی اہلیہ سرینا عیسیٰ نے پولیس کو درخواست دی تھی جبکہ سپریم کورٹ نے ازخود نوٹس بھی لیا تھا۔

آغا افتخار اس وقت جیل میں ہیں اور آج سپریم کورٹ میں ان کے خلاف توہین عدالت کیس کی سماعت ہوگی۔