پاکستان ٹیلی کمیونی کیشن اتھارٹی (پی ٹی اے) نے آن لائن گیم پب جی پر پابندی برقرار رکھنے کا فیصلہ کر لیا ہے۔
اپنے اعلامیے میں پی ٹی اے نے کہا ہے کہ پب جی انتظامیہ سے تفصیلات طلب کی گئی تھیں جن میں پب جی کے سیشنز، استعمال کنندگان کی تعداد اور دیگر معلومات شامل تھیں مگر پب جی انتظامیہ نے مطلوبہ تفصیلات فراہم نہیں کیں۔
لاہور میں پب جی نے تیسرے نوجوان کی جان لے لی
اعلامیے میں بتایا گیا ہے کہ کمپنی کے نافذکردہ کنٹرولز کی تفصیلات بھی مانگی گئی تھیں تاہم پب جی انتظامیہ کی طرف سے کوئی جواب موصول نہیں ہوا جس کے بعد اس گیم پر پابندی برقرار رکھنے کا فیصلہ کیا گیا ہے۔
یاد رہے کہ اس سے قبل پی ٹی اے پب جی پر پابندی کا عارضی فیصلہ کیا تھا، پی ٹی اے کے ترجمان کا کہنا تھا کہ یہ فیصلہ مختلف حلقوں سے ملنے والی شکایات کے بعد کیا گیا ہے۔
انہوں نے پب جی کھیلنے والے نوجوانوں کی خودکشی کے حوالے سے کہا تھا کہ لاہور میں گیم کھیلنے کی اجازت نہ ملنے پر دو بچوں نے خودکشی کر لی تھی جن کے ورثاء نے لاہور ہائیکورٹ سے رجوع کیا تھا جہاں پی ٹی اے کو اس معاملے کو دیکھنے اور فیصلہ کرنے کی ہدایت کی گئی تھی۔
واضح رہے کہ اس ماہ پب جی کھیلنے والے 3 نوجوان خودکشی کر چکے ہیں۔
