حکومت پنجاب نے عید الاضحیٰ پر کورونا پھیلاؤ کے خدشات کے پیش نظر 9 روز کے لیے سخت لاک ڈاؤن کا اعلان کر دیا ہے جو 27 اور 28 جولائی کی درمیانی رات سے شروع ہو کر 5 اگست رات 12 بجے تک جاری رہے گا۔
محکمہ صحت کی جانب سے جاری کردہ نوٹی فکیشن میں کہا گیا ہے کہ لاک ڈاؤن کے دوران صوبے بھر کے کاروباری مراکز مکمل طور پر بند رہیں گے۔
عید سے پہلے اور بعد میں ہونے والے اس لاک ڈاؤن کے دوران کھیل کے میدان، تعلیمی ادارے، شادی ہال، بیوٹی پارلر اور سینما گھر بھی مکمل طور پر بند رہیں گے۔
حکم نامے میں کہا گیا ہے کہ سماجی، مذہبی، نجی اور عوامی مقامات پر ہر قسم کے اجتماعات پر پابندی عائد ہو گی، چھوٹی دکانیں، شاپنگ مالز اور پلازے بھی نہیں کھولے جا سکیں گے۔
حکم نامے کے مطابق میڈیکل سٹورز، پنکچر کی دکانیں، آٹے کی چکیاں، کورئیر سروسز، گیس اور پٹرول اسٹیشنز، کال سنٹر، زرعی مشینوں کی دکانیں اور پرنٹنگ پریس کو کھلے رکھنے کی اجازت ہو گی۔
نیشنل کمانڈ اینڈ آپریشن سینٹر اور قومی ادارہ برائے صحت نے خدشہ ظاہر کیا ہے کہ عید الاضحیٰ پر اگر عوام نے ایس او پیز پر عمل نہ کیا تو پاکستان میں کورونا مریضوں کی تعداد ایک بار پھر بڑھ سکتی ہے جس پر قابو پانے میں کم سے کم دو ماہ لگ سکتے ہیں۔
