وفاقی حکومت نے مولانا فضل الرحمان کے بھائی ضیاالرحمان کی خدمات خیبر پختونخوا کے حوالے کر دی ہیں، انہیں چند روز قبل ہی حکومت سندھ نے کراچی میں ڈپٹی کمشنر تعینات کیا تھا۔
اسٹیبلشمنٹ ڈویژن کے ایک نوٹی فکیشن میں کہا گیا ہے کہ پروونشل مینیجمنٹ سروسز کے 19ویں سکیل کے افسر ضیاالرحمان کا فوری تبادلہ کر کے ان کی خدمات خیبرپختونخوا کے حوالے کر دی گئی ہیں۔
ذرائع کے مطابقاس سے قبل خیبرپختونخوا حکومت نے اسٹیبلشمنٹ ڈویژن کو کہا تھا کہ ضیاالرحمان کو واپس اپنے صوبے میں بھیجا جائے۔
اپنے خط میں کے پی حکومت نے کہا تھا کہ صوبہ پہلے ہی کیڈر افسران کی شدید کمی کا شکار ہے اس لیے ضیاالرحمان کی خدمات واپس کی جائیں۔
یاد رہے کہ 23 جولائی کو حکومت سندھ نے فرحان غنی کا تبادلہ کر کے ان کی جگہ ضیاالرحمان کو کراچی کے وسطی ضلع کا ڈپٹی کمشنر تعینات کر دیا تھا۔
باخبر حلقوں کا کہنا ہے کہ یہ فیصلہ مولانا فضل الرحمان، آصف زرداری اور بلاول بھٹو کے درمیان 10 جولائی کی ملاقات میں کیا گیا تھا۔
خیبرپختونخوا کے افسر کو سندھ میں تعینات کرنے کے فیصلے کے بعد شدید تنقید شروع ہوئی تو حکومت سندھ نے اس کی ذمہ داری وفاق پر ڈال دی۔
سندھ کے وزیر اطلاعات ناصر شاہ کا کہنا تھا کہ مولانا فضل الرحمان کا بھائی ہونا کوئی جرم نہیں ہے۔
