فیس بک اور ٹویٹر نے امریکی صدر ڈونلڈ ٹرمپ اور ان کی مہم کے اکاؤنٹس پر پابندیاں عائد کرتے ہوئے انہیں محدود کر دیا ہے۔
امریکی صدر نے فاکس نیوز کو ایک انٹرویو میں کہا تھا کہ بچے کورونا سے تقریباً محفوظ ہیں، ان کی یہ ویڈیو فیس بک نے کورونا کے متعلق نقصان دہ غلط معلومات دینے پر ڈیلیٹ کر دی ہے۔
اسی ویڈیو پر ٹویٹر نے صدر ٹرمپ کی مہم کا ایک اکاؤنٹ اس وقت تک منجمد کر دیا ہے جب تک یہ ویڈیو کلپ وہاں سے ہٹا نہیں دیا جاتا۔
یاد رہے کہ یو ایس پبلک ہیلتھ نے واضح طور پر کہا ہوا ہے کہ بچے کورونا سے محفوظ نہیں ہیں۔
کورونا کے متعلق ایک ویڈیو نے یوٹیوب، فیس بک اور ٹویٹر کو پریشان کر دیا
صدر ٹرمپ کی متنازعہ پوسٹ نہ ہٹانے پر فیس بک ملازمین کی مارک زکربرگ پر تنقید
فیس بک کے ایک ترجمان نے کہا ہے کہ اس ویڈیو میں یہ غلط معلومات دی گئی تھیں کہ لوگوں کا ایک گروہ کورونا سے محفوظ ہے، یہ ہماری پالیسیوں کی واضح خلاف ورزی ہے۔
فیس بک نے پہلی بار صدر ٹرمپ کی کوئی پوسٹ ڈیلیٹ کی ہے، اس سے قبل ان کے پیج پر کئی بار پابندیاں عائد ہو چکی ہیں۔
ٹویٹر انتظامیہ نے اس حوالے سے کہا ہے کہ انہوں نے صدر ٹرمپ کی مہم کا اکاؤنٹ منجمد کر دیا ہے جس کا مطلب ہے کہ وہ یہاں سے مزید کوئی ٹویٹ نہیں کر سکیں گے۔
ٹویٹر ترجمان کے مطابق اکاؤنٹ نے اسی انٹرویو کا ایک کلپ شیئر کیا تھا جو کورنا کے متعلق اطلاعات کے حوالے سے ان کی پالیسیوں کی خلاف ورزی ہے۔
انہوں نے کہا کہ اکاؤنٹ کو متحرک کرنے کے لیے اس کے مالک کو یہ ویڈیو ڈیلیٹ کرنی ہو گی، بعد ازاں یہ ویڈیو ڈیلیٹ کر دی گئی۔
یاد رہے کہ گزشتہ ماہ ٹویٹر نے امریکی صدر کے بیٹے ڈونلڈ جونیئر کا اکاؤنٹ بھی معطل کر دیا تھا، انہوں نے کورونا وائرس اور ہائیڈرو آکسی کلوروکوئن کے متعلق غلط معلومات دی تھیں۔
صدر ٹرمپ نے فوکس نیوز کو انٹرویو دیتے ہوئے کہا تھا کہ اگر آپ بچوں کو دیکھیں تو وہ کورونا کی بیماری سے تقریباً مکمل طور پر محفوظ ہیں۔
