اسلام آباد: پاکستان پیپلزپارٹی کے چیئرمین بلاول بھٹو زرداری نے کہا ہے کہ ہمیں لائن میں آنے کے لیے دھمکیاں دی جا رہی ہیں لیکن ہم پہلے بھی دباؤ میں نہیں آئے اور اب بھی نہیں آئیں گے۔
احتساب عدالت سے باہر میڈیا سے گفتگو کرتے ہوئے انہوں نے کہا کہ زرداری سے اسقدر خوف ہے کہ پورے اسلام آباد کی پولیس یہاں کھڑی کر دی گئی ہے۔ وکلا کو عدالت میں آنے سے روکا گیا۔
انہوں نے کہا کہ یہ کٹھ پتلی حکومت ہے جس کی ڈور کہیں اور سے ہلتی ہے، یہ میرے خاندان کے ساتھ نفسیاتی کھیل کھیل رہے ہیں، موقف سے نہ ہٹنے کی صورت میں انتقامی کارروائیاں ہوتی ہیں۔
بلاول بھٹو زرداری نے سوال اٹھایا کہ کیا یہ سب جج پر دباؤ ڈالنے کی کوشش تھی یا ہم پر؟ یہ نہ ملٹری کورٹ ہے اور نہ ہی ان کیمرہ عدالت، عوام کو کارروائی دیکھنے کا حق حاصل ہے۔
انہوں نے کہا کہ ہم جمہوریت، این ایف سی اور 18ویں ترمیم پر اپنا موقف تبدیل نہیں کریں گے چاہے پورا خاندان گرفتار ہو جائے۔ ہم نے یحیٰ، ضیاء اور مشرف کی آمریت کا مقابلہ کیا ہے، اس کٹھ پتلی حکومت کا مقابلہ بھی کریں گے۔
بلاول بھٹو زرداری نے کہا کہ جب کوئی کیس اور دلیل نہ ہو تو گالیاں دی جاتی ہیں، نیب وکیل کے پاس کوئی دلیل نہیں تھی اس لیے وہ ساتھی وکیلوں کو گالیاں دے رہا تھا۔
انہوں نے کہا کہ ہم عدالتوں پر یقین رکھتے ہیں، عدالت میں ذوالفقار بھٹو کا کیس ابھی زیرالتوا ہے، ہم اس کے فیصلے کے بھی منتظر ہیں، اگر ہم عدالتوں پر یقین نہیں رکھیں گے تو اور کون رکھے گا۔
