سینیٹ کی قائمہ کمیٹی برائے سائنس اینڈ ٹیکنالوجی کے اجلاس میں وزارت کے 8 اداروں کے بغیر سربراہ کے چلنے کا انکشاف ہوا ہے۔
سینیٹر مشتاق احمد کی زیرصدارت سینیٹ کی قائمہ کمیٹی برائے سائنس اینڈ ٹیکنالوجی کے اجلاس میں یہ بات سامنے آئی، چیئرمین کمیٹی نے کہا کہ وزارت کے 8 ادارے بغیرسربراہ کے چل رہے اورکوئی اس بارے میں سنجیدگی کا مظاہرہ نہیں کر رہا۔
وزارت کے حکام نے بتایا کہ سربراہوں کے نام فائنل ہوچکے ہیں اور 2 اداروں کے سربراہوں کی تقرری ہوچکی ہے جس پر سینیٹر مشتاق احمد نے برہمی کا اظہار کرتے ہوئے کہا کہ باقی 6 اداروں کے سربراہوں کی تعیناتی عمل میں کیوں نہیں لائی جارہی؟ سربراہوں کے بغیر ادارے کیسے چلیں گے؟
سینیٹر ہدایت اللہ نے کورونا سے متعلق وزارت کو تحقیق کیلئے فنڈزنہ جاری کرنے کا معاملہ اٹھایا جس پر چیئرمین کمیٹی نے کہا کہ ملک میں کسی اور کا کام کوئی اورکرتا ہے۔
وزارت سائنس اینڈ ٹیکنالوجی میں افسران کی ترقی کے معاملے پر حکام نے بتایا کہ ترقی کے تمام کیسز نمٹا دیئے ہیں، سلیکشن بورڈ بدھ کو ہوگا۔
چیئرمین کمیٹی نے وزیرکی غیرموجودگی پر برہمی کا اظہارکرتے ہوئے آئندہ اجلاس میں حاضری یقینی بنانے کی ہدایت کی۔
