کراچی کے علاقے بلدیہ ٹاؤن میں محکمہ انسداد دہشت گردی اور رینجرز نے مشترکہ کارروائی کرتے ہوئے 2 دہشت گردوں کو ہلاک کر دیا ہے۔
رینجرز کے ترجمان کے مطابق رفیق عرف عادل عرف حبیب اللہ اور عدنان شبیرعرف قاری انتہائی مطلوب دہشت گرد تھے، رفیق عرف عادل کی گرفتاری پر 20 لاکھ روپے انعام مقرر تھا جبکہ عدنان شبیرعرف قاری کالعدم تنظیم کا انتہائی خطرناک دہشت گردتھا۔
ترجمان نے بتایا کہ ہلاک دہشت گرددھماکوں، بینک ڈکیتی، فرقہ ورانہ دہشت گردی میں ملوث تھے، انہوں نے قانون نافذ کرنے والے اداروں کے اہلکاروں کو بھی قتل کیا، ان کا تعلق کالعدم تحریک طالبان پاکستان اسلم گروپ سے تھا۔
رینجرز کا کہنا ہے کہ دونوں ہلاک دہشتگرد حال ہی میں دہشتگردی کے لیے افغانستان سے پاکستان آّئے تھے، محمد رفیق وزیرستان میں دہشتگردی کے کے لیے مائنز، آئی ای ڈیز اور بم تیار کرتا تھا۔
ترجمان نے مزید بتایا کہ 2015 مارچ میں دہشتگرد نے شاہ لطیف ٹاون مین پولیس وین کو بلاسٹ سے اڑایا تھا، جس میں 2 اہلکار شہید اور 15 زخمی ہوئے تھے۔
اسی طرح 2014 اکتوبر میں دہشتگرد نے حب ریور روڈ پر دھماکہ کرکے 4 افراد کو زخمی کیا، 2010 میں سٹی کورٹ میں حملہ کرکے اپنے ساتھیوں کو پولیس کسٹڈی سے چھڑا کر لے گیا تھا، اس حملہ میں ایک پولیس اہلکار کو شہید اور ایک کو زخمی کیا گیا تھا۔
ترجمان نے بتایا کہ دہشتگرد عدنان لشکر جھنگوی کے نعیم بخاری اسحاق بوبی، عاصم کیپری کا قریبی ساتھی تھا اور پولیس کے متعدد اہلکاروں کو شہید کر چکا تھا۔ اس نے 2014 اور 2015 میں متعدد پولیس افسران اور اہلکاروں کو کورنگی کے علاقے میں شہید کیا تھا۔
