عمران خان مشکل میں پھنسے تو کوئی بڑا فیصلہ کر لیں گے، شیخ رشید

وفاقی وزیر ریلوے شیخ رشید احمد کا کہنا ہے کہ عمران خان کسی کو این آر او نہیں دیں گے، اگر وہ مشکل میں پھنس گئے تو کوئی بڑا فیصلہ کر سکتے ہیں۔

میڈیا سے گفتگو کرتے ہوئے ان کا کہنا تھا کہ مولانا فضل الرحمان نے تحریری معاہدے کی درخواست دی ہے۔

انہوں نے کہا کہ مریم نواز اس وقت شہباز شریف کو پھنسا رہی ہیں، جو پتھر لے کر وہ نیب کی طرف گئی تھیں، وہ پتھر انہوں نے شہباز شریف کی سیاست کو مارے ہیں۔

ان کا کہنا تھا کہ اب وفاقی حکومت سابق وزیراعظم نواز شریف کو اشتہاری قراردینے کے لیے عدالت میں جائے گی۔

ایک سوال کے جواب میں وفاقی وزیر نے کہا کہ اپوزیشن کو احتساب سے گزرنا پڑے گا، بلاول بھٹو زرداری ابھی بچہ ہے۔

انہوں نے راولپنڈی میں 5 نئی یونیورسٹیاں بنانے کا اعلان کیا اور کہا کہ وہ چین کے ساتھ ریلوے یونیورسٹی کی تعمیر کے لیے رابطے میں ہیں، یہ ایشیاء کی سب سے بڑی جامعہ ہو گی۔

انہوں نے اعلان کیا کہ اپنی زندگی پر لکھی ہوئی ان کی کتاب 6 ستمبر کو منظرعام پر آئے گی۔

شیخ رشید کا کہنا تھا کہ ملک کی ترقی کے لیے کوشش کررہے ہیں، راولپنڈی میں سماجی شعبے کی ترقی کے لیے متعدد منصوبے مکمل کیے گئے، راولپنڈی میں تعلیم کے شعبے میں کئی نئے ادارے قائم کیے گئے۔