جمعیت علمائے اسلام (ف) کے سربراہ مولانا فضل الرحمان کی قیادت میں اپوزیشن جماعتوں کا اتحاد قائم کرنے پر اتفاق ہو گیا ہے۔
ذرائع کے مطابق اس اتحاد میں ن لیگ اور پیپلزپارٹی کو شامل نہ کرنے کا فیصلہ کیا گیا ہے، اپوزیشن کی چھوٹی تمام جماعتوں کو ن لیگ اور پیپلز پارٹی سے تحفظات ہیں۔
جے یو آئی ایف کے ذرائع کا کہنا ہے کہ اپوزیشن کی جماعتوں نے فیصلہ کیا ہے کہ جب تک ن لیگ اور پیپلزپارٹی اپنے متعلق تحفظات دور نہیں کرتیں، دیگر پارٹیاں اپوزیشن کا کردار ادا کریں گی۔
ذرائع کے مطابق جےیوآئی، اے این پی، پی کے میپ، قومی وطن پارٹی، نیشنل پارٹی نئے اتحاد کا حصہ ہوں گی جبکہ حکومت سے علیحدہ ہونے والی جماعت بی این پی مینگل بھی اس میں شامل ہو گی۔
سینیٹر میر حاصل بزنجو کے انتقال کے باعث اپوزیشن کی چھوٹی جماعتوں کا اجلاس تاخیر کا شکار ہوا، نئے اتحاد کا اجلاس جلد مولانا فضل الرحمان کی صدارت میں ہوگا۔
