فلپائن میں دو بم دھماکوں میں کم از کم 11 افراد ہلاک اور درجنوں زخمی ہو گئے ہیں۔
اطلاعات کے مطابق یہ دھماکے صوبائی دارالحکومت جولو میں ہوئے ہیں، ان دھماکوں میں ایک خاتون خودکش حملہ آور کی ہلاکت کی بھی اطلاعات ہیں۔ یہ علاقہ دہشت گرد تنظیم ابوسیاف کا مضبوط گڑھ سمجھا جاتا ہے۔
فلپائنی فوج کا کہنا ہے کہ پہلا دھماکہ دن کے 12 بجے ایک مصروف سڑک پر ہوا، ایک گھنٹے بعد اس جگہ سے 100 میٹر دور دوسرا دھماکہ ہو گیا۔
مقامی میڈیا کے مطابق ہلاک اور زخمی ہونے والوں میں اکثریت پولیس اور فوج کے اہلکاروں کی ہے۔
فوج کا کہنا ہے کہ پہلا دھماکہ اس وقت ہوا جب پولیس اور فوج کے اہلکار کورونا کے سلسلے میں مقامی حکام کی مدد میں مصروف تھے، دوسرا دھماکہ ایک معروف کیتھڈرل کے ساتھ ہوا۔
یاد رہے کہ گزشتہ برس اسی کیتھڈرل میں ایک خودکش حملے میں 23 افراد ہلاک ہو گئے تھے۔
جولو کے میئر کا کہنا ہے کہ دھماکوں میں کم از کم 6 سیکیورٹی فورسز کے جوان، ایک پولیس افسر اور 4 شہری ہلاک ہوئے ہیں۔ 18 فوجی اہلکار، 6 افسر اور 19 شہری زخمی ہوئے ہیں۔
ابھی تک کسی گروہ نے دھماکوں کی ذمہ داری قبول نہیں کی تاہم اس علاقے میں جنگجوؤں کی موجودگی کے باعث حالات خراب رہتے ہیں۔
ابوسیاف گروپ نے داعش کے ساتھ وفاداری کا اعلان کیا ہوا ہے، یہ گروپ کئی حصوں میں تقسیم ہو چکا ہے جن میں ایک مضبوط دھڑا حاطب حجان کی قیادت میں کام کر رہا ہے۔
