ایون فیلڈ ریفرنس میں سزا کے خلاف نواز شریف، مریم نواز کی اپیلیں سماعت کے لیے مقرر

اسلام آباد ہائیکورٹ میں ایون فیلڈ ریفرنس میں سابق وزیراعظم نواز شریف اور ان کی صاحبزادی مریم نواز کی اپیلیں سماعت کے لیے مقرر کر دی گئی ہیں۔

تفصیلات کے مطابق ان اپیلوں پر سماعت یکم ستمبر کو ہو گی، جسٹس عامر فاروق اور جسٹس محسن اختر کیانی پر مشتمل پینل سماعت کرے گا۔

اس سے قبل العزیزیہ ریفرنس میں سزا کے خلاف نواز شریف کی اپیل بھی سماعت کے لیے مقرر ہے، انہیں حاضری سے استثنیٰ دینے پر بھی غور کیا جا رہا ہے۔

یاد رہے کہ 19 ستمبر کو اسلام آباد ہائی کورٹ نے نوازشریف، مریم نواز اور کیپٹن (ر) صفدر کی سزائیں معطل کر کے انہیں رہا کرنے کا حکم دیا تھا، یہ فیصلہ جسٹس اطہر من اللہ اور جسٹس میاں گل حسن اورنگ زیب نے دیا تھا۔

مختصر فیصلے میں عدالت نے کہا تھا کہ نیب نے ضمانت کی درخواستوں پر بحث کے لیے زیادہ تر پانامہ فیصلے کا سہارا لیا تھا، احتساب عدالت نے اپارٹمنٹس کی خریداری میں مریم نواز کی معاونت کے شواہد کا ذکر نہیں کیا تھا۔

اس سے قبل احتساب عدالت نے 6 جولائی 2018 کو ایون فیلڈ ریفرنس میں نواز شریف کو 10 برس، مریم نواز کو 7 برس اور کیپٹن صفدر کو 1 سال قید کی سزا سنائی تھی، بعد ازاں ان تینوں کو عدالت سے ضمانت پر رہائی مل گئی تھی۔

رہائی کے بعد نواز شریف طبی بنیادوں پر علاج کے لیے برطانیہ چلے گئے تھے۔