اسلام آباد: یکم ستمبر سے 15 روز کے لیے پیٹرولیم مصنوعات کی قیمتوں میں 9 روپے فی لیٹر تک اضافے کا امکان ہے۔
باخبر ذرائع کے مطابق اوگرا نے تیل کی قیمتوں کے نظرثانی شدہ فارمولے پر کام مکمل کر لیا ہے اور اب ہر 15 روز کے لیے قیمتوں میں ردوبدل کیا جائے گا۔
نظرثانی شدہ فارمولے کی بنیاد ہائی اسپیڈ ڈیزل اور پیٹرول پر 30 روپے فی لیٹر لیوی وصول کی جائے گی جو اس سے قبل بالترتیب 25.73 اور 27.70 روپے تھی۔
ڈان اخبار کے مطابق ایکسچینج ریٹ میں ردوبدل اور قیمتیں طے کرنے کے نئے طریق کار کے بعد پیٹرول اور ہائی اسپیڈ ڈیزل کی قیمتوں میں فی لیٹر 8 سے 9 روپے تک اضافے کا امکان ہے۔
ذرائع کا یہ بھی کہنا ہے کہ ملک میں سیلابی صورتحال کے پیش نظر قیمتوں میں اضافے کے متعلق ابھی تک حکام کی رائے تقسیم ہے لیکن تیل کی صنعت کو نقصان سے بچانے کے لیے کم از کم 4 سے 5 روپے بھی لیٹر اضافہ ناگزیر ہے۔
ذرائع کے مطابق آخری فیصلہ کرنے سے قبل یہ معاملہ وزیراعظم عمران خان کے سامنے لے جایا جائے گا۔
اس وقت حکومت پیٹرول اور ہائی اسپیڈ ڈیزل پر 42 روپے فی لیٹر ٹیکس وصول کر رہی ہے، تمام پیٹرولیم مصنوعات پر جنرل سیلز ٹیکس بڑھا کر 17 فیصد کر دیا گیا ہے۔ گزشتہ برس جنوری تک حکومت لائٹ ڈیزل پر 0.5 فیصد، مٹی کے تیل پر 2 فیصد، پیٹرول پر 8 فیصد اور ہائی اسپیڈ ڈیزل پر 13 فیصد سیلز ٹیکس وصول کر رہی تھی۔
