ایکسائز اینڈ ٹیکسیشن ڈیپارٹمنٹ اسلام آباد نے پنجاب کے مختلف علاقوں سے چوری ہونے والی 6 قیمتی گاڑیاں پنجاب پولیس کے حوالے کر دیں۔
محکمے کا کہنا ہے کہ پنجاب پولیس کے حوالے کی جانے والی گاڑیاں لاہور اور راولپنڈی کے مختلف علاقوں سے چوری کی گئی تھی۔
ڈائرکٹر ایکسائز اسلام آباد بلال اعظم خان کا کہنا ہے کہ ایکسائز اینڈ ٹیکسیشن ڈیپارٹمنٹ اسلام آباد نے گاڑیاں رجسٹریشن اور ٹرانسفر کے دوران خصوصی چیکنگ کے ذریعے حراست میں لیں۔
انہوں نے مزید کہا کہ گاڑیوں کی رجسٹریشن اور ملکیت تبدیلی کے وقت گاڑیوں کی فزیکل چیکنگ کے دوران بڑی تعداد میں گاڑیاں برآمد کی گئیں ہیں۔
انہوں نے بتایا کہ ایکسائز اینڈ ٹیکسیشن ڈیپارٹمنٹ میں فزیکل چیکنگ کے دوران گاڑیاں چوری شدہ اور ٹمپرڈ نکلیں۔ برآمد ہونے والی تمام گاڑیاں متعقلہ پولیس اسٹیشن کے ذریعے اصل مالکان کے حوالے کی جا رہی ہیں۔
بلال اعظم خان نے بتایا کہ شہریوں کو مالی نقصان سے بچانے کیلئے گاڑیاں شو رومز پر رجسٹرڈ کرنے کا فیصلہ کر لیا گیا ہے۔ شہریوں کی سہولت کیلئے گھر کی دہلیز پر گاڑیوں کی رجسٹریشن کا نظام بھی متعارف کرایا گیا ہے۔
انہوں نے تفصیلات بتاتے ہوئے کہ گزشتہ مالی سال میں ایکسائز ڈیپارٹمنٹ نے ماضی کی نسبت 3 گنا زائد ریوینو حاصل کر کے قومی خزانے میں جمع کرایا۔
انہوں نے عوام سے درخواست کی ہے کہ وہ دفتر آنے سے پہلے ایکسائز اینڈ ٹیکسیشن ڈیپارٹمنٹ اسلام آباد کی ویب سائٹ سے ضروری معلومات ضرور حاصل کریں۔
