وزیراعظم عمران خان نے کراچی کے لیے 11 سو ارب روپے کے بڑے پیکج کا اعلان کر دیا ہے۔
وزیراعلیٰ سندھ مراد علی شاہ اور گورنر سندھ عمران اسماعیل کے ہمراہ میڈیا سے گفتگو کرتے عمران خان نے کہا کہ کراچی میں بارشوں سے تباہی مچ گئی۔ شہر کے مسائل کے مستقل حل کے لیے کوشاں ہیں۔
انہوں نے کہا کہ کورونا اور ٹڈی دل کے چیلنج سے نمٹنے کے لیے کمیٹیاں تشکیل دی گئیں، کسی بھی مسئلے سے نمٹنے کے لیے کوآرڈی نیشن ضروری ہے، قدرتی آفات سے نمٹنے کے لیے ہر وقت فوج کی مدد درکار ہوتی ہے۔
عمران خان نے کہا کہ کراچی میں نالے، نکاسی آب، بےگھر افراد اور کچرے کو ٹھکانے لگانے جیسے مسائل موجود ہیں۔ کراچی کی سڑکوں اور دیگر انفراسٹریکچر کا مسئلہ حل کرنا ضروری ہے۔
انہوں نے مزید بتایا کہ ہم نے ملکر کورونا سے نمٹنے کے لیے اقدامات کیے۔ ہم کراچی کے مسائل کے حل کے لیے بھی ملکر کام کریں گے۔ کراچی والوں کے لیے پینے کا پانی بڑامسئلہ ہے۔ کراچی میں ٹرانسپورٹ کےساتھ سڑکوں کابھی مسئلہ ہے۔
وزیراعظم نے کراچی کے لیے اعلان کیے گئے پیکج کو تاریخی قرار دیتے ہوئے کہا کہ کراچی میں پانی کا مسئلہ 3 سالوں میں حل کرنے پر اتفاق ہوا ہے۔
وزیراعظم نے کہا کہ تمام فیصلے صوبائی رابطہ عملدرآمد کمیٹی کے ذریعے ہوں گے۔
انہوں نے کراچی سرکلر ریلوے مکمل کرنے کا بھی اعلان کیا۔
